सिकिस्त देश -कृष्ण कट्टेल

Posted on: March 04, 2017 | views: 492

हिजोदेखि कलेजो अनसनमा छ
आजदेखि मुटु आन्दोलनमा छ

मस्तिष्क छुट्टै मान्छे हुँ भन्छ

कानले सधैँ उल्टोमात्र सुन्छ


टाउको भन्छ म भन्दा
कोहि छैन माथी
पैताला भन्छ सधैँ
दबिन्न साथी

मुखले मात्र खायो भन्दै
हत्केला रिसाउछ
कति बोक्नु एक्लै भन्दै
पेट दुःख बिसाउछ

छाती मलाई छुट्टै
मान्छे भन् भन्छ
पाखुरा आफ्नै
बाहुबल कहन्छ

आजभोलि
मेरा प्रत्येक अंग
छुट्टाछुट्टै मान्छे हुँ भन्छन्
आफू आफैसँग प्रश्न गर्छु
खै म एउटा मान्छे हुँ
वा मेरा प्रत्येक अंग
छुट्टाछुट्टै मान्छे हुन् ?
सोच्दासोच्दै सिकिस्त म
अब ‘म’ नरहन सक्छु
कोहि आएर बचाऊ मलाई
अर्थात बचाऊ मेरो देशलाई ।।