सजाय -एलिसा पौड्याल 'एकलास'

Posted on: September 11, 2016 | views: 975

तिमीलाई माया गर्नु
या
तिमीबाट मायाको अपेक्षा गर्नु
केहो मेरो गल्ती

हरेकपल
मायाको बदलामा
घृणाहरु पठाउँछौ तिमी
म सोझी
त्यसमै सन्तुष्ट भइदिन्छु
हरकष्ट सहन्छु
निरन्तर
पीडाका ज्वालाहरु शान्त पार्न
आँखाबाट बहन्छु
तप्पतप्प

प्रिय प्रियतम
मलाई कुट
चिथोर
सक्छौ घाँटी नै निचोर
तर बिन्ति
वचनका अणुबमहरु खसालेर
नष्ट नगरिदेऊ
ध्वस्त नपारिदेऊ
मेरो मनका सुन्दर
हिरोसिमा र नागासाकीहरु
किन कि
त्यो सँगै मर्नेछन्
लाखौं इच्छाहरु
चाहनाहरु
रहरहरु
र, यी सबका हत्याको
आरोपित तिमी
सजायको भागेदार हुनेछौ
जुन म चाहन्न

बरु म
यति रुनेछु
यति रुनेछु
एकदिन
मेरा आँसुहरु जमेर
बन्नेछ
ठूलो समुन्द्र
तिमी आउनु
खुसीका नाउहरुमा चढ्दै
मेरा अस्रुको सागरमा
आफ्नो सुखको सयर गर्न
हो प्रियतम
यही हुनेछ
मलाई कठोर सजाय
तिमीलाई माया
गरेको कसुरमा