मेरो सपना र आत्मश्रद्धान्जली -एलिशा पौड्याल

Posted on: August 25, 2016 | views: 1260

स-साना ढुङ्गाहरु मिलाएर बनाइएको
झट्ट हेर्दा मन्दिर झैँ लाग्ने
सयौंको सङ्ख्यामा झुरुप्प रहेका
चिहानहरुको बस्ती
मध्यरात
घाटको यात्रा गर्दै
म अकेली

निस्किएर चिहानबाट
एउटा कालो छाँया
पछ्याउन थाल्छ मलाई
भन्नुपर्दा
लखेटिन्छु म
एउटा मृत आत्माबाट
चिच्याउँछु
कराउँछु
त्यो पच्छ्याइरहन्छ
म दौडिरहन्छु
उकाली चढ्छु
ओराली झर्छु
ज्यान बचाउनका खातिर
म भागिरहन्छु
त्यो लखेटिरहन्छ
अन्त्यमा
पुग्दछु म नदिकिनार
त्यो आइराछ
सिध्याउँछ पक्का...सोच्छु
र फालहाल्छु
मिसिन्छु त्यो जलप्रवाहमा
र बग्छु सँगसँगै

बचाऊ बचाऊ
यही ओकलीरहन्छु बारम्बार
आउँदैन
कुनै दरिलो हात
सहाराको...
मलाई बचाउन
नदि मलाई बगाइरहन्छ
म बगिरहन्छु
बाँच्नुको झिनो आसासमेत बाँच्दैन

म दिन्छु
आफुले आफैँलाई श्रद्धान्जली

असिनपसिन हुँदै
ब्युँझिन्छु
एउटा भयानक सपनाबाट

म अर्थात् नेपाल आमा।।।।