“हामी हौं प्रभाती, अदम्य सहिदका रक्तिम"-बिजु सुवेदी “विजय”

Posted on: May 26, 2016 | views: 997

“हामी हौं प्रभाती, अदम्य सहिदका रक्तिम,
क्रान्तिकारी, सिर्जनशील, जनमुक्तीका महामान्छे ।

हामी हौं प्रभाती मान्छे, ज्वालामुखी–चट्याङ निकाल्ने,
अन्यायीलाई सधैं झुकाउने, वैरीको नामोनिशान मेटाउने ।

हामी हौं अदम्य मान्छे, साहसको आँधीबेहरी ल्याउने,
आकाश–पाताल एक बनाई धर्तीलाई संसार बनाउने ।

हामी हौं सङ्घर्षशील मान्छे, रक्तकुण्डमा क्रान्तिको कमल फुलाउने,
दिन–रातलाई परास्त गरी प्रभाती किरण सदा फुलाउने ।

हामी हौं सहिदका रक्तिम मान्छे, विद्रोहको ज्वाला दन्काइरहने,
हुँकारले व्रम्हाण्ड कम्पायमान गरी, सारा ठाउँमा दासता हटाउने ।

हामी हौं सिर्जनशील मान्छे, गरिबको बस्तीमा लाली किरण दिने,
जस्तै कठिनमा पनि सुवास देख्ने, दुःखीतिर सुगन्ध छल्काउने ।

हामी हौं जनमुक्तिका मान्छे, अन्यायलाई बदला लिने रक्तवीज,
महाभूकम्प–महाप्रलय ल्याउने, समतामूलक समाज सदा बनाउने ।

हामी हौं क्रान्तिकारी मान्छे, न्यायको बिगुल सदा फुक्ने,
बम–बारुदलाई सहजै पचाउने, राता झन्डा फर्फराइरहने ।

हामी हौं प्रभाती, अदम्य सहिदका रक्तिम,
क्रान्तिकारी, सिर्जनशील, जनमुक्तीका महामान्छे”

बिजु सुवेदी “विजय”को रत्न पुस्तक भण्डारबाट केहि समय अगाडि प्रकाशित कथा सङ्ग्रह “सत्य सङ्घर्षका कथाहरु”बाट