बा, तादी र नयाँवर्ष -एलिशा पौड्याल

Posted on: May 02, 2016 | views: 340

बचपनदेखि
बा र तादीको
भिषण युद्द चल्दै आएको छ
बा
तादीखोला पौडिएरै तर्छन्
तादी अझै गहिरो भइदिन्छे
मानौं
ऊ चाहन्छे
बालाई आफ्नो छातीमा कैद गर्न
तर
बा निर्धक्क पौडिन्छन्
हातखुट्टा फट्याएर
चाल्दै चाल्दै
पन्छाउँदै पानीका छालहरु
बा पुग्छन् तादीको किनारमा
हिजोदेखी आजसम्म
बा'को यो कर्म
जारी छ, जारी छ, जारी छ
न बा थाक्छन्
न तादी बालाई थकाउने प्रयास छाड्छे
बस्
छाड्छन् त छाड्छन्
बाको बचपनले बालाई
बाको वैंसले बालाई
सायद
बाको वृद्दावस्थाले पनि बालाई
त्यस्तै
तादीको किनारले किनारलाई
तादीको ढुङ्गा र बालुवाले तादीलाई
सायद
तादीको अस्तित्वले तादीलाई
तर
कुनै बदलाव छैन
बा र तादीको लगावमा
भलै
सालहरु फेरिउन् बर्सेनि
दिन र रातको संसर्गबाट
फेरी
एउटा नयाँ साल जन्मियोस्

बा सोध्छन्
हरेक वैशाख एक गते
त्यही
चिप्लेटी ढुङ्गोमा बसेर
बा'की प्रथम प्रेमिका
हैन हैन
बा'कि अन्तिम प्रेमिका
तादिसँग
हरवर्ष एउटै प्रश्न
प्रिया,
के पायौ गत वर्षमा??
मौनता मै जवाफ दिन्छे तादि
अफसोच
बा मौनताको भाषा बुझ्दैनन्

थाल्छन् गहिरिन
तादी सुसाउँछे
बा सुसाउँछन् सँगसँगै
दुवै रुन्छन्
अनकन्टार जिन्दगीको अन्धकारमा
एउटा रुवाइ
धित नमरुन्जेल

तादी
हर वर्ष
बदलिरहन्छे आफ्नो स्थान
कहिले
कुनाबाट बग्छे
कहिले
छेऊबाट बग्छे
अहँ छोड्दै छोड्दैनन् बा
तादीलाई पछ्याउन
तादिले किनार फेरेजस्तै
हर वर्ष
बा फेरिरहन्छन्
भित्ताको पात्रो
किनिरहन्छन्
अनिश्चित भविष्य नियाल्न
एउटा नयाँ राशिफल
हरेक नयाँ वर्षमा