कोशी ब्यारेज ! : भानुभक्त आचार्य

Posted on: August 13, 2017 | views: 661

उ बेला कांग्रेसले कोशी बेच्यो,

गण्डकी र टनकपुर बेच्यो भन्थे, 

पुल बन्ला, बिजुली देला

विकास गरिदेला भन्ने सोचियो, 

आखिर बगेर जाने पानी त हो, 

त्यसै पनि दक्षिणतिरै जाने हो 

भन्ने सोझो चिताइयो । 

अहिले आएर मार खाइयो । 

-----------------

हिउँदमा भएभरको पानी 

नहर हुँदै भारत लाने, 

अनि खडेरी जति हामीलाई । 

बर्खामा ब्यारेजको ढोका बन्द गर्ने, 

सिमाना मिचेर बाँधहरु बनाउने, 

बाढी आउँदा थुन्ने र नेपाल डुबाउने । 

यो प्रपञ्च हामीले बुझेनौं ।

चूपचाप लम्पसार परिरह्यौं । 

-----------------

तराई डुबेको त्यसै होइन । 

नेपाल–भारत सिमा छेउका 

एक दर्जनभन्दा बढी बाँधहरुले 

देश जलमग्न छ, डुबिरहेको छ । 

खडेरीमा पानी नदिने, 

बाढीमा निकास नदिने । 

कोशी ब्यारेज, ब्यारेज होइन

यो पासो हो, गलपासो । 

-------------------

छिमेकी प्रभुसँग लम्पसार पर्दापर्दा

हिउँदमा खडेरीले र बर्खामा बाढीले 

देश डुबेको थाहै भएन हनुमानहरुलाई, 

आर्थिक रुपमा असमान व्यापारले 

हाम्रो अर्थतन्त्र डुबेकै थियो, 

दक्षिणको अघोषित नाकाबन्दीले 

भूइँचालोले भन्दा बढी थिचियौं, पिल्सियौं । 

अझ तिनका सर्त र आदेशहरुले 

हाम्रो स्वाभिमान दुखेकै थियो

पटक पटक, कयौं पटक । 

तर, सत्ताको भागबन्डा र लुछाचुँडीमा 

अल्मलिएको राजनीतिले 

प्रभूको भलो चिताउँदा चिताउँदै

देश डुबेको पत्तो पाएन । 

----------------

व्यारेजको ढोका नखोल्दा तराई डुब्छ, 

खोल्दा सरकार ढल्न सक्छ, 

प्रभु बेखुस हुने वा रिसाउन सक्छन् । 

त्यसैले, 

सरकार धर्मसंकटमा छ ।

अब सरकार जोगाउने कि जनता ? 

सरकार नभए पनि जनता थियो र हुनेछ । 

सरकार बनाउने जनता नै हो । 

-------------------

त्यसैले सरकार ढले ढलोस् 

अब चूप लागेर नबासौं, 

ब्यारेजको चाबी खोसौं । 

सार्वभौमिकताका पक्षमा बोलौं, 

सिमानाका बाँधहरु भत्काऔं । 

असमान सन्धिहरु खारेज गरौं ।