ट्रम्पद्धारा आफ्नो आलोचना गर्ने मिडियालाई ह्वाइट हाउस प्रवेशमा रोक

Posted on: February 25, 2017 | views: 586

एजेन्सी ।
आफ्नो आलोचना गर्ने मिडियालाई अमेरिकी राष्ट्रपति डोनाल्ड ट्रम्पले ह्वाइट हाउस प्रवेशमा रोक लगाएका छन् ।

शुक्रबार ह्वाइट हाउसका प्रवक्ताले आयोजना गरेको पत्रकार सम्मेलनमा सीएनएन, बीबीसी, न्यूयोर्क टाइम्स, गार्जियन लगायतका चर्चित मिडियाका बरिष्ठ सम्बाददातालाई ह्वाइट हाउस प्रवेशमा रोक लगाइएको बताएका हुन् ।

उक्त पत्रकार सम्मेलनमा समेत ट्रम्पका नीतिप्रति उदारभाव राख्ने मिडियालाई मात्र छानीछानी पत्रकार सम्मेलनमा प्रवेश दिइएको थियो ।
ट्रम्प सरकारको नीतिको आलोचना गरिरहेका अमेरिकी मिडियाका सम्बाददातालाई पत्रकार सम्मेलनमा समेत पस्न दिइएन ।
 
ह्वाइट हाउसका बिषयमा बर्षौंदेखि रिपोर्टिङ गरिरहेका बरिष्ठ सम्बाददाताहरुलाई पत्रकार सम्मेलन कक्षभित्र प्रवेश गर्ने क्रममा सूचीमा उनीहरुको नाम नभएको भन्दै रोकिएको थियो ।

ह्वाइट हाउसको अपमानजनक नीतिप्रति असन्तुष्टि जनाउँदै प्रवेश दिइएका केही मिडियाले पनि पत्रकार सम्मेलन बहिस्कार गरेका थिए ।

‘ह्वाइट हाउसको अस्वीकार्य ब्यबहार हो,’ सीएनएनले बिज्ञप्ति जारी गर्दै भनेको छ, ‘उनीहरुलाई मन नपर्ने तथ्यहरु प्रकाशन गर्दा ट्रम्प प्रशासनले कस्तो ब्यबहार गर्छ भन्ने यो बलियो उदाहरण हो । तर हामी रिपोर्टिङ गरिरहन्छौं ।’

रिपोर्टिङका दौरान ह्वाइटहाउसबाट अहिलेसम्म यस्तो निच ब्यवहार कहिल्यै नभोगेको भन्दै अन्य मिडियाहरुले पनि आलोचना गरेका छन् ।

ट्रम्पका नीतिको आलोचना गरेका मिडियाहरुलाई ट्रम्पले सार्वजनिक रुपमै ‘फेक न्यूज मिडिया’ अर्थात नक्कली समाचार छाप्ने मिडिया भन्दै सार्वजनिक रुपमै आलोचना गर्दै आएका थिए ।

ट्रम्पले आफ्नो ट्विटर मार्फत मिडिया र अमेरिकी गुप्तचर निकायको समेत सुचना चुहाएको भन्दै आलोचना गर्दै आएका छन् ।

अमेरिकी राष्टपति रहेका डोनाल्ड ट्रम्प आफ्नो बिजयमा रुसले गरेको भनिएको इमेल ह्याकिंगमा संलग्नता र उनको कामको टिप्पणीबाट मिडियासँग रुष्ट रहँदै आएका छन् ।