उत्तर कोरियाले आणविक बम परिक्षण गरेको पुष्टि गर्दै जापानी प्रधानमन्त्रीको बिरोध

Posted on: September 13, 2016 | views: 556

२८ भदौ, जापान ।
जापानी सरकारले तीनदिन अघि उत्तर कोरियामा ५.३ रेक्टर स्केलको पराकम्पन आउनेगरि उत्तर कोरियाले आणविक कमको परिक्षण गरेको बताएको छ ।

जापानका प्रधानमन्त्री सिन्जु आवेले उत्तर कोरियाले गरेको परमाणु हतियार परिक्षणको विरोध गरेका छन् ।

आवेशले विश्व शान्तिको लागि जापानले योगदान गर्ने भन्दै देशका सुरक्षा अधिकारीहरुसँग यस बारेमा छलफल गरेका छन् ।

पछिल्लो नौ महिनामा उत्तर कोरियाले २ वटा परमाणु परिक्षण गरेको बताउँदै जापानी प्रधानमन्त्री आवेले उत्तर कोरियाको यस्ता गतिविधिलाई सहन नसकिने कडा टिप्पणी गरेका छन् ।

उत्तर कोरियाले यसअघि पनि युद्धक विमान खसाल्ने ब्यालेस्टिक क्षेप्यास्त्र परिक्षण गरेको थियो । जुन गत महिना जापानी क्षेत्रमा खसेको थियो ।

समुन्द्री क्षेत्रमा बढ्दै गएको चीनको गतिविधिबाट सुरक्षा चासो र चिन्ता खेपिरहेको जापान पछिल्लो समय उत्तर कोरियाले लगातार गरिरहेको ब्यालेस्टिक क्षेप्यास्त्र परिक्षण र आणविक बम परिक्षणबाट सुरक्षामा चुनौति थपिएको निस्कर्षमा पुगेको छ ।

जापान र जापानी जनतालाई शान्तिपूर्ण जीवन जीउन सबै उपाय अपनाउने बताएका आवेले आफुले जापानको नयाँ राष्ट्रिय सुरक्षा नीति र देशको आत्मरक्षाको लागि महत्वपूर्ण भूमिका खेल्ने बताएका छन् ।

राष्ट्रिय सुरक्षा नीति स्थापित भएको र अब लागु मात्र गर्न बांकी रहेको आवेले प्रष्ट पारेका छन् ।

उत्तर कोरियाले यसै बर्षमात्र २० वटा ब्यालेस्टिक क्षेप्यास्त्र परिक्षण गरिसकेको छ भने पछिल्लो पटक उसले गरेको परमाणु परिक्षण अहिलेसम्मकै ठूलो हो । यसअघि उत्तर कोरियाले चार पटक यस्ता खाले आणविक परिक्षण गरिसकेको छ ।

जापानका रक्षा मन्त्री तोमोमी इनादाले समेत उत्तर कोरियाले पछिल्लो ४ वटा परमाणु हतियारको सफल परिक्षण गरिसकेको यसअघि बताइसकेका छन् ।

पछिल्लो परमाणु हतियार परिक्षण उत्तर कोरियाले जनवरीमा गरेको थियो ।

उत्तर कोरियाको नेतृत्वमा किम जोंग उन आएपछि त्यहाँ परमाणु र आणविक हतियारको विकासले तीव्रता पाएको छ ।

अमेरिका, पश्चिमा देश र उनिहरुका सहयोगी देशहरुले उत्तर कोरियामाथि आर्थिक सहित सबैजसो नाकाबन्दी लगाएपनि आफ्नो लक्ष्यमा कति नडगमगाएको उत्तर कोरियाली नेतृत्व आणविक हतियार सम्पन्न भएको ठानिएको छ ।

अमेरिकाले यसअघि यस्ता गतिविधि गर्दै आएका देश तथा शासकलाई आतंकवाद लगायत अन्य कारण बनाएर आक्रमण गर्ने गरेपनि उत्तर कोरियामाथि कुनैपनि किसिमको हस्तक्षेप तथा आक्रमण गर्न सकेको छैन ।

उत्तर कोरियाले छिमेकी तथा विश्वको दोश्रो शक्तिमान देश चीनको साथ पाउँदै आएको छ भने रसियाले पनि उत्तर कोरियामाथि नरम नीति अपनाउँदै आएको छ ।