उत्तर कोरियाले परमाणु बम परीक्षण गर्दा ५.३ को भूकम्प

Posted on: September 09, 2016 | views: 553

२४ भदौ, एजेन्सी ।
उत्तर कोरियाले परमाणु बम परीक्षण गर्दा उत्तर कोरियामा ५.३ रेक्टर स्केलको भूकम्प गएको छ ।

दक्षिण कोरिया सरकारले उत्तरले परमाणु परीक्षण गरेका कारण भूकम्पको धक्का आएको दाबी गरेको छ ।

अमेरिकी भौगर्भिक सर्बेका अनुसार भूकम्पको झट्का जमिनको माथिल्लो सतहमा महसुस गरिएको थियो । प्राकृतिक भूकम्प जमिनको तल्लो भागमा जाने भन्दै उसले पनि यो परमाणु परिक्षणको धक्का भएको दावी गरेको छ ।

दक्षिण कोरियाको राष्ट्रिय सुरक्षा एजेन्सी यस विषय बारे अध्ययन गर्न आकस्मिक बैठक डाकेको छ ।

यो संभावित परमाणु परीक्षण १९४८ मा उत्तर कोरिया गठन गरिएको वर्षगाठको अवसरमा भएको हो ।

जापानका प्रधानमनत्री शिन्जो आवेले उत्तर कोरिया कुनै परीक्षण गर्छ भने त्यसलाई सहन नसकिने बताएका छन् ।  अमेरिकाले पनि उत्तरको गतिविधिको अध्ययन गरिरहेको जनाएको छ ।

स्मरणीय छ उत्तर कोरियाले अमेरिका तथा युरोपेलि युनियन तथा छिमेकी दक्षिण कोरिया र जापानको चेतावनीका बावजुद छोटो तथा लामो दुरीको क्षेप्यास्त्र परिक्षण गर्दै आएको छ ।