दुबईमा चालकविनाको बस चल्न थाल्यो

Posted on: September 03, 2016 | views: 881

एजेन्सी ।
खाडी मुलुक संयुक्त अरब इमिरेट्सको बन्दरगाह सहर दुबईमा विद्युतीय प्रविधिबाट चल्ने चालकविनाको बस सेवा चल्न सुरु भएको छ ।

करिब एक महिना लामो परीक्षणपछि बिहिबारबाट दुबईमा यो सेवालाई औपचारिक रुपमा व्यावसायीक सञ्चालन थालिएको हो ।

मिनि बस निर्माता कम्पनी र दुबई शहर व्यवस्थापनले बढ्दो तापक्रम वृद्धिसँगै जलवायुमा आएको परिवर्तन र बढ्दो सहरीकरणमा परिरहेको असरलाई यस्तो बस सेवाले थोरै भनेपनि सहयोग पुग्ने आशा लिएको बताएको छ ।

हाल यो सेवा १० सिटको गाडीबाट सहरको करिब ७०० मिटर सडकमा सुरु गरिएको छ । यो सेवा छिट्टै विस्तार गर्दै मुख्य शहरभर सेवा दिइने बताइएको छ ।

विश्वको बसैभन्दा अग्लो टावर बुर्ज खालिफा क्षेत्रमा सुरुका दिनमा यो सेवा चलाइएको छ ।
 
इजी माइल नामक फ्रान्सेली समूह तथा दुबईस्थित ओमनिक्स कम्पनीले संयुक्त रुपमा निर्माण गरेको मिनिबस ४० किलोमिटर प्रतिघण्टाको गतिमा कुट्ने गर्छ ।

सडकमा पैदलयात्रीले बाटो काट्न लागेको पाइए रोकिएर बाटो काट्न दिने प्रविधि समेत जडान बसले अन्य गाडीको गती अनुसार आफ्नो गति निर्धारण गर्ने बताइएको छ ।

दुबई खाडी मुलुकका केही पर्यटकीय सहरमध्ये एक प्रसिद्ध पर्यटकीय गन्तव्य हो । दुबईमा सन् २०१५ मा मात्रै एक करोड ४२ लाख बढी पर्यटक घुम्न गएका थिए ।