७ जापानी सहित २० जनाको बंगलादेशमा आतंककारीद्धारा हत्या

Posted on: July 02, 2016 | views: 884

१८ असार, एजेन्सी ।
बंगलादेशको राजधानी ढाकाको एक क्याफेमा बन्धक बनाइएका मध्ये २० जनाको हत्या भएको छ । बन्दुकधारीले गोली हानी ७ जापानी नागरिक सहित विदेशीको हत्या गरेका हुन् ।

होली आर्टिशन बेकरी क्याफेमा शुक्रबार अबेर हमला गरेका थिए र त्यसको झण्डै १२ घण्टापछि सुरक्षाकर्मीले जवाफी कारबाही गरेका थिए । ६ जना आक्रमणकारी मारिएको तथा एक जनालाई गिरफ्तार गरिएको सरकारी प्रवक्ताले जनाएका छन् । चार विदेशी नागरिकसहित १३ जनाको जीवितै उद्धार गरिएको सरकारी अधिकारीले बताएका छन् ।

आक्रमणकारीहरुले बन्दूक, विस्फोटक पदार्थ र घरेलु हतियार प्रयोग गरेको बंगलादेशी सेनाका ब्रिगेडियर जनरल नइम अस्फाक चौधरीले बताएका छन । बन्धकहरुको शव बन्धक प्रकरण सकिएपछि बल्ल फेला परेको थियो । गुलशन जिल्लास्थित होली आर्टिशन बेकरी क्याफेमा भएको आक्रमणमा बन्धक बनाइएकामध्ये अधिकांश इटलीका र केही जापानी हुन । शुक्रबार अबेर राति भएको गोली हानाहानमा कम्तीमा दुई प्रहरीको ज्यान गएको थियो भने ३० प्रहरी अधिकारी घाइते भएका थिए । शुक्रबार राति ८/९ जना बन्दुकधारीले क्याफेमा आक्रमण गरेको प्रहरीले जनाएको छ । लडाकुहरुले ‘प्रायः विदेशीहरु गइरहने’ एउटा रेष्टुराँमा आक्रमण गरेको उल्लेख छ ।

यसरी भयो आक्रमण
प्रत्यक्षदर्शीहरुलाई उद्दृत गर्दै गर्दै सिएनएनले जनाए अनुसार होली आर्टिसन बेकरीमा शुक्रबार साँझ एक्कासी ६ देखि ८ जना बन्दूकधारी प्रवेश गरेका थिए । उनीहरु हावामा बन्दूक पड्काउँदै भित्र छिरेका थिए । क्याफेका ग्राहकहरु सबै कुर्सी र टेबलमुनि सुतेका थिए । यही क्रममा कोही भाग्न भ्याए। कोही छततिर लागे कोही अर्कैतिर लागे । एकैछिनमा उनीहरुले विस्फोटक पदार्थहरु एकपछि अर्को गर्दै फ्याँक्न थाले ।

अल्लाहु अकबर भन्दै उनीहरुले पुलिसहरु माथि गोली चलाउन र विस्फोटक पदार्थ फ्याँक्न थाले । बन्धकमा पर्नेहरुमध्ये अधिकांश मुस्लिम हुन् र उनीहरु रमजान ब्रत तोड्न रेष्टुरेन्टमा भेला भएका थिए । बंगलबादेशबाट प्रकाशित हुने डेजी स्टार पत्रिकाका अनुसार बन्धुकधारीहरुले बन्धक बनाइएकाहरुलाई कुरान श्लोक भन्न लगाएका थिए । श्लोक भन्न नसक्नेहरुलाई उनीहरुले यातना दिएको पत्रिकाले लेखेको छ । डेली स्टारले लेखेको छ, बन्धुकधारीले बंगलादेशी नागरिकलाई मात्रै खानेकुरा दिएका थिए । इस्लामवादी लडाकुहरुले धर्मनिरपेक्ष ब्लगरहरु, समलिङ्गी अधिकारवादीहरु, प्राज्ञ एवम् केही धार्मिक अल्पसंख्यकहरुको हत्या गरेको आरोप माझ क्याफेमा पछिल्लो आक्रमण भएको छ ।

प्रत्यक्षदर्शीको भनाइ
एकजना प्रत्यक्षदर्शीले भनेका छन, मैले पिज्जा बनाउने भान्सामा काम गरिरहेको थिएँ र दुईजना व्यक्तिले आक्रमण गरिरहेको देखेँ । मानिसहरु लुक्न र भाग्न थाले । म घरको छतमा पुग्न सफल भएँ । उनीहरुले बम फालिरहेका थिए र झ्यालहरु हल्लिरहेका थिए ।

आइएसले लियो घटनाको जिम्मेवारी
सो आक्रमणको जिम्मेवारी आतंकवादी संगठन इस्लामिक स्टेट र अल कायदा दुवै संगठनले लिएको अन्तराष्ट्रिय संचारमाध्यमले जनाएका छन् । इस्लामिक स्टेटेले आक्रमणको चारघण्टापछि घटनाको जिम्मेवारी लिएको हो । बंगलदेशमा आइएसले यसअघि नै आक्रमणको चेतावनी दिएको थियो ।

प्रधानमन्त्रीको सम्बोधन
घटनापछि टेलिभिजन मार्फत सम्बोधन बंगलादेशी प्रधानमन्त्री शेख हसिनाले निकै क्रुर र जघन्य अपराध भएको बताएकी छिन् । उनले आइएसआइले आफूलाई मुश्लिम बताएपनि उनीहरुको कुनै धर्म नभएको भन्दै आफ्नो सरकार बंगलादेशबाट आतंकको जरो उखाल्नका लागि तत्पर रहेको चेतावनी दिएकी छन् ।

सुरक्षित स्थानमै आक्रमण
ढाकाको सुरक्षित गुलशन इलाकामा आक्रमण भएको हो । बंगलादेशमा यसअघि पनि यसप्रकारका हत्याका घटनाहरु हुने गरेका थिए । तर ती आक्रमण आतंकवादी नभएर धार्मिक अतिवादीहरुले गराएका थिए । ती आक्रमणहरुमा हत्यापछि हत्यारा फरार भएका घटना सार्वजनिक हुन्थे । तर यो आक्रमणमा आतंकवादीहरुले बन्धक बनाउने कार्य गरेका छन् । शुक्रबार साँझबाट उक्त इलाकालाई पूरा बन्द गरिएको थियो । यस्तो सुरक्षा व्यवस्था बंगलादेशमा कहिल्यै नदेखिएको सञ्चारमाध्यमहरुले जनाएका छन् । बंगलादेशमा शुक्रबार साँझ करिब साढे ८ बजे सुरु भएको आक्रमणपछि कमाण्डो आउन नै करिब १२ बजे सम्म लाग्नुले बंगलादेशको सुरक्षा बल आतंकवादको सामना गर्न तयार नभएको विश्लेषण हुन थालेको छ । बंगलादेशको यो सबैभन्दा सुरक्षित क्षेत्र हो । यसले इस्लामिक स्टेटले जुनसुकै बेला पनि आक्रमण हुन सक्ने सन्देश दिएको छ ।

नेपाली सुरक्षित
प्रहरीले स्थानीय समय अनुसार शुक्रबार बेलुकी ९ बजेर २० मिनेट जाँदा क्याफेमाथि बन्दुकधारीहरुले फायरिङ्ग शुरु गरेको जनाएको छ । सो क्याफे विदेशी नागरिक, कूटनीतिज्ञ र मध्यम वर्गीय परिवारमाझ लोकप्रिय छ । यसैबीच, ढाकास्थित कार्यवाहक नेपाली राजदूत सुशीलकुमार लम्सालले बांग्लादेशमा रहेका नेपालीहरु सुरक्षित रहेको बताएका छन । उनका अनुसार घटनास्थल नेपाली राजदूतावासदेखि करिब एक किलोमिटर टाढा छ ।

एसिया गम्भिर बन्नुपर्छ
ढाका घटनाले आतंकवादको छाँया विस्तारै दक्षिण एसियातर्फ फैलने संकेत देखिएको छ । बंगलादेशमा आईएसले गरेको आतंककारी हमलाबाट एशियाली मुलुकहरु यसबारे गम्भीर हुनु जरुरी छ । खासगरी भारत, पाकिस्तान, चीन, बंगलादेश, श्रीलंका लगायतका मुलुकहरुले आतंकवाद रोक्न ठोस कार्ययोजना ल्याउनु जरुरी छ ।
दीपक धिताल -एजेन्सीहरुको सहयोगमा