आबेद्धारा इराकलाई सहयोग र पुर्ननिर्माणमा सहयोगको प्रतिवद्धता

Posted on: April 05, 2018 | views: 4991

टोकियो ।

जापानी प्रधानमन्त्री सिन्जो आबेले युद्धका कारण तहसनहस बनेको इराकको पूर्ननिर्माणमा सघाउने प्रतिवद्धता जनाएका छन् ।


प्रधानमन्त्री आबेले इराकमा नागरिकहरुसँग रहेको हतियार सरकारलाई फिर्ता गर्ने अभियानसँगै नागरिकलाई व्यवसायिक प्रशिक्षण तथा पुर्ननिर्माणमा सहयोग गर्न जापानले नेतृत्व लिने बताएका हुन् ।


आबेले बिहिबार टोकियोमा इराकको पुर्ननिर्माण तथा सुरक्षा स्थापान बारे भएको एक अन्र्तराष्ट्रिय सम्मेलनमा यस्तो प्रतिबद्धता जनाएका हुन् ।


इराकी प्रधानमन्त्री हैदर अल अबादी सहित करिव ३० देश तथा विभिन्न अन्र्तराष्ट्रिय संगठनका अधिकारी सामेल सम्मेलनमा आबेले संवोधनका क्रममा जापानी प्रतिबद्धता जनाए ।


इराक सरकारले गएको डिसेम्बर महिनामा चरमपन्थी लडाकु समुह इस्लामिक स्टेटमाथि इराकमा बिजय हाँसिल गरेको घोषणा गरेपनि इराकमा कयौं साना ठूला चरमपन्थी संगठनहरु सरकार बिरुद्ध हतियार सहित बिद्रोह तथा आक्रमण गरिरहेका छन् ।


आबेले संवोधनका क्रममा भनेका छन् सच्चा जीत त्यतिबेला हुनेछ जब समृद्धिसँगै सुरक्षा स्थापना गर्न सकिन्छ जुन समय हिंसात्मक कट्टरपन्थीहरुले फेरी टाउको उठाउन सक्नेछैनन् ।


आबेले भने जापान इराकमा सरकारी नियन्त्रण बाहिर रहेको हतियार नियन्त्रण लिन तथा हतियार लिएर बसेकाहरुलाई व्यवसायिक प्रशिक्षणसँगै समृद्धि स्थापना गर्न र इराकको पुर्ननिर्माणमा सहयोग गर्नेछ ।