ट्रम्पद्वारा अमेरिकामा संकटकाल घोषणा

Posted on: October 27, 2017 | views: 8439

एजेन्सी ।

अमेरिकी राष्ट्रपति डोनल्ड ट्रम्पले अमेरिकाभर संकटकाल घोषणा गरेका छन् । तर यस्तो संकटकाल भने जनस्वास्थ्यको क्षेत्रमा घोषणा गरिएको हो ।


अमेरिकीहरुले दुखाइ कम गर्ने र अन्य नसालु औषधीहरु प्रयोग गर्ने लतलाई राष्ट्रिय लज्जाको संज्ञा दिंदै ट्रम्पले यस्ता औषधीको दुरुपयोगलाई रोक्न संकटकाल घोषणा गरेका हुन् ।


यस्ता औषधीको प्रयोगका कारण प्रत्येक दिन १ सय ४० भन्दा बढी अमेरिकीहरुको ज्यान जाने गरेको बिबिसिले उल्लेख गरेको छ ।


राष्ट्रपति ट्रम्पले यसअघि नै जनस्वास्थ्यसम्बन्धी राष्ट्रिय संकटकाल घोषणा गर्ने बाचा गरेका थिए ।


बिहीबार ह्वाइट हाउसमा बोल्दै ट्रम्पले अहिलेको समयमा अमेरिकीहरुको कार दुर्घटना र बन्दुकका कारण हुने मृत्युको संख्या भन्दा दुखाई कम गर्ने र अन्य नसालु पदार्थको प्रयोगका कारण बढी मृत्यु हुने गरेको बताए ।

उनले भनेका छन्, अमेरिकी समाजको कुनै पनि त्यस्तो भाग बाँकी छैन, जहाँ नसालुऔषधीको प्रयोगले नसताएको होस्।


उनले भने, 'हामीले अरबौं अरब डलर खर्च गरेका छौं र अब धेरै पैसा हामी नसा नलगाउने खालको दुखाई कम गर्ने औषधी ल्याउनमा खर्च गर्नेछौं ।'

उनले यस्ता दुखाई कम गर्ने औषधीहरुको खपत विश्वका अन्य मुलुकका नागरिकले भन्दा अमेरिकीहरुले अत्यधिक गर्ने बताए।

अहिलेको घोषणाले जनस्वास्थ्यसम्बन्धी देखिएको संकटसँग जुध्नका लागि अनुदान रकम प्रयोग गर्न निर्देशित गर्छ।


संकटकालपछि कामचलाउ स्वास्थ्य मन्त्रीलाई निर्देशन दिनुका साथै स्वास्थ्यसम्बन्धी संघीय संस्थाहरुलाई पनि दुखाई कम गर्ने र अन्य नसालु औषधीहरुको प्रयोगबाट हुने मृत्यु कम गर्नका लागि आवश्यक उपायहरु अपनाउन निर्देशन दिन भनेका छन् ।


आलोचकहरुले भने ट्रम्पको घोषणा अनुसार थप आर्थिक कोषहरु अहिलेकै अवस्थामा प्रयोग गर्दा समस्या समाधान नहुने टिप्पणी गरेका छन् ।