अमेरिकाले बनाएको आफ्नो हत्याको योजना किमले चोरेपछि

Posted on: October 12, 2017 | views: 11988

एजेन्सी ।

समाचार संस्था एपिले दक्षिण कोरियाली अधिकारीहरुलाई उदृत गर्दै दुई साता अघि उत्तर कोरियाली नेता किमजोङ उनलाई मार्ने अमेरिकी र दक्षिण कोरियाली योजना रहेको खुलासा गरेको थियो ।


तर अमेरिका र दक्षिणले किमलाई मार्न बनाएको योजना असफल भएपछि मात्र उक्त योजना सार्वजनिक भएको पाइएको छ ।


आफ्ना नेतालाई मार्ने गोप्य सुचनाको समाचार अघिनै जानकारी पाएको उत्तर कोरियाली सरकारले आफ्ना इन्टरनेट ह्याकर मार्फत त्यस्तो योजना हात पारेको ठानिएको छ ।


समाचार संस्था बिबिसिले दक्षिण कोरियाली सांसद री शियोल जो दक्षिण कोरियाली रक्षा आवद्ध संसदीय समितिमा समेत छन् उनले त्यस्तो योजना उत्तरले चोरेको बताएका छन् ।


यसरी आफ्ना नेता मार्ने योजना चोरी गरेका उत्तर कोरियाली ह्याकरहरुले इन्टरनेट मार्फत दक्षिण कोरियाली गुप्तचर निकायको कम्प्युटरमा छिरेर कम्प्युटरमा रहेका गोप्य सामग्री चोरेको बताइएको छ ।


चोरी गरिएको उक्त दस्तावेजमा अमेरिकी तथा दक्षिण कोरियाको सैन्य कमाण्डरसँग जोडिएको गोप्य जानकारी समेत रहेको ठानिएको छ ।


२३५ जीबी डाटाको गोप्य दस्तावेज चोरीमा दक्षिण कोरिया र अमेरिकी सैन्य कमाण्डको जानकारी मात्र नभएर उत्तर कोरियामाथि गर्न सकिने सम्भाव्य आक्रमण तथा रक्षा योजना समेत रहेको ठानिएको छ । यद्यपी दक्षिण कोरियाली सरकारले यसको पुष्टि र खण्डन गरिसकेको छैन ।