६.३ रेक्टर कम्पनको परमाणु परिक्षण पछि उत्तर थप क्षेप्यास्त्र परिक्षणमा, बिनास निम्त्याउने युद्धको भय

Posted on: September 04, 2017 | views: 1371

टोकियो ।

जापानको भूमि नघाएर समुन्द्रमा मिसाइल हानेको चार दिनमै ६.३ रेक्टरको कम्पन ल्याउनेगरि परमाणु परिक्षण गरेको उत्तर कोरिया थप घातक मिसाईल परिक्षणको तयारीमा जुटेको छ ।


आइतबार बिहान भूकम्पको मापनमा ६.३ रेक्टरको कम्पनले जापान, दक्षिण कोरिया, चिन र रुसमा समेत अनुभव गरिएको बिनासकारी आणविक बम परिक्षण सफल भएको उत्तर कोरियाले दाबी गरेको छ । हाईड्रोजन बम परिक्षण भएको बताइएको उक्त दाबीलाई अमेरिका सहित जापान, दक्षिण कोरियाले समेत स्विकारेको छ । यद्यपी उनिहरुले यसको बारेमा जानकारीहरु बटुलीरहेको बताएका छन् ।


यसैबिच पछिल्लो घटनाक्रमहरुमा कोरियाली प्रायद्धिपमा रहेको बिवाद घट्नुको साटो बढ्ने संकेत देखिएको छ । उत्तर कोरियाले अणुबम परिक्षण गरेको तस्विरहरु सार्वजनिक गरेपछि दक्षिण कोरियाले उत्तरले अणुबम परिक्षण गरेको उसको भूभागलाई ध्वस्त बनाउन सक्ने शक्ति रहेको देखाउने गरि जमिनबाट क्षेप्यास्त्र र युद्धबिमानबाट रकेट प्रहार गरेको अध्यास गरेको छ । उसनले यसको तस्विर र भिडियो समेत सार्वजनिक गर्दै उत्तर कोरियालाई शक्ति प्रदर्शन गर्दै सचेत पारेको छ ।


उता अमेरिकाले भने उत्तर कोरियाले बिसाल सैन्य सामना गर्नुपर्ने र नसोचेको क्षति व्यहोर्नुपर्ने भन्दै उसमाथि घातक हतियारको आक्रमणको चेतावनी दिएको छ ।


के के भएत आजसम्म उत्तर कोरियाले आणविक बम परिक्षण गरेपछि बिबिसी नेपालीमा प्रकाशित केही समाचार यहाँ प्रस्तुत छ


दक्षिण कोरियाद्वारा 'लाइभ-फायर' अभ्यास



दक्षिण कोरियाले आफ्नो सेनाले पूर्वी तटीय क्षेत्रमा क्षेप्यास्त्र परीक्षण गरेको तस्वीर सार्वजनिक गरेको छ।

दक्षिण कोरियाले उत्तर कोरियाको परमाणु अस्त्र क्षेत्रमा आक्रमण गरेको प्रतीत हुने गरी 'मिसाइल ड्रिल' अर्थात् क्षेप्यास्त्र अभ्यास गरेको छ।

प्योङयाङले छैठौं पटक परमाणु अस्त्र परीक्षण गरे लगत्तै दक्षिण कोरियाले त्यस्तो अभ्यास गरेको हो।

'लाइभ-फायर' अभ्यासको क्रममा लडाकू विमानबाट रकेट र जमिनबाट बलिस्टिक क्षेप्यास्त्र प्रहार गरिएको थियो।


चिन्ता

उत्तर कोरियाली कदमलाई लिएर चीन र रुसमा गम्भीर चिन्ता व्यक्त भइरहँदा दक्षिण कोरियाले पछिल्लो सैनिक अभ्यास गरेको हो।

चीनका राष्ट्रपति सि जिन पिङ र रुसी राष्ट्रपति भ्लादिमिर पुटिनले कोरियाली प्रायद्वीपमा तनाव कम गर्नु पर्नेमा जोड दिएका छन्।

जापानले चाहिँ पछिल्लो परीक्षण क्षमा गर्नै नसकिने काम भएको बताएको छ।


उत्तर कोरियाको पछिल्लो परीक्षण यो दशकको छैठौं यस्तो खाले परीक्षण हो।

वासिङ्टनमा ट्रम्प प्रशासनले जे जस्ता प्रतिक्रिया दिने गरेको भएपनि प्योङयाङले निकै तीव्र गतिका परमाणु अस्त्रको विकास गरिरहेको छ। त्यो धेरैले अपेक्षा गरेभन्दा फरक परिस्थिति हो

जोनाथन मार्कस, प्रतिरक्षा तथा कुटनैतिक संवाददाता, बीबीसी

प्रभाव

पछिल्लो परिक्षणका बेला ६ म्याग्नीच्युड भन्दा ठूलो भूकम्पको धक्का महसुस् गरिएको थियो।


त्यो कम्पनको असर उत्तर कोरियासँग जोडिएको चिनियाँ भूभागमा समेत परेको बताइएको छ।

बीबीसीका प्रतिरक्षा तथा कुटनीतिक संवाददाता जोनाथम मार्कस भन्छन्, "वासिङ्टनमा ट्रम्प प्रशासनले जे जस्ता प्रतिक्रिया दिने गरेको भएपनि प्योङयाङले निकै तीव्र गतिका परमाणु अस्त्रको विकास गरिरहेको छ। त्यो धेरैले अपेक्षा गरेभन्दा फरक परिस्थिति हो।"


कति शक्तिशाली छ उत्तर कोरियाको हाइड्रोजन बम?




उत्तर कोरियाले आइतबार भूमिगत विष्फोट गराएको हाइड्रोजन बम निकै शक्तिशाली मानिएको छ।

कुनै कुनै अनुमानले त्यसको शक्ति एक सय किलोटन भएको उल्लेख गरेका छन्।

अर्थात अमेरिकाले सन् १९४५ मा जापानको नागासाकीमा खसालेको फ्याट बोय नामक अणु बम भन्दा यो पाँच गुणा शक्तिशाली हो।

नागासाकी विष्फोटले तत्काल ७० हजारको ज्यान गएको थियो।

तर अझ पनि मानव निर्मित सबभन्दा शक्तिशाली विष्फोटहरुको तुलना गर्ने हो भने चाहिं यो निकै सानो नै हो।

परमाणु दौड उत्कर्षमा पुगेको बेला सन् १९६१ मा सोभियत युनियनले बमहरुको राजा नाम दिएको बमको विष्फोट गराएको थियो।

उक्त हाइड्रोजन बमको शक्ति ५० हजार किलोटनको थियो।


प्रतिरोधको नीति

तर पनि उत्तर कोरियाको हालको शासन शैली अनि उसका छिमेकीहरुसंगको सम्बन्धका कारण उसको परीक्षणलाई अन्तर्राष्ट्रिय जगतले निकै गम्भीरताका साथ लिएको छ।

बीबीसीका विश्लेषक जनाथन मार्कस भन्छन् यसले कयौंले अपेक्षा गरेभन्दा तीव्र गतिमा सबै कित्तामा उत्तर कोरियाली परमाणु कार्यक्रमले प्रगति गरिरहेको छ भन्ने संदेश दिएको छ।

सैन्य चेतावनी, एक्ल्याउने प्रयास र प्रतिबन्ध जस्ता उत्तर कोरियामाथि दवाव दिने सबै उपाए प्योङ्याङलाई पछाडि धकेल्न विफल देखिएका छन्।


के यो भन्दा थप पनि गरिनसक्छ?

पक्कै पनि, तर कडा आर्थिक दवावले त्यहाँको सत्तालाई सम्भवत: निसहाय बनाइदिन र उसलाई वर्वादीतर्फ धकेल्न सक्छ जुन कुराको सामना गर्न चीन अनिच्छुक लाग्छ।

प्योङ्गयाङ्गको परमाणु कार्यक्रमलाई अब पछाडी फर्काउने भन्दा पनि परमाणु अस्त्रले सुसज्जित भइसकेको उत्तर कोरियासंग अब विश्व जगतले नियन्त्रण र प्रतिरोधको नीति प्रधान रुपमा अपनाउन सक्ने देखिन्छ।


अमेरिकाद्वारा उत्तर कोरियालाई कडा चेतावनी




प्योङयाङले लामो दुरीको क्षेप्यास्त्रमा जडान गर्न सकिने हाइड्रोजन बमको सफलतापूर्वक परीक्षण गरिएको बताएको छ।

अमेरिकी रक्षा मन्त्री जेम्स म्याटिसले अमेरिका वा उसका मित्र शक्तिविरुद्ध उत्तर कोरियाका सृजना गर्ने सुरक्षा खतराविरुद्ध "कडा सैन्य प्रतिक्रिया" दिइने बताएका छन्।

उत्तर कोरियाले गरेको पछिल्लो परमाणु अस्त्र परीक्षणपछि अमेरिकी राष्ट्रपति डोनल्ड ट्रम्पलाई राष्ट्रिय सुरक्षाका विषयमा जानकारी दिएलगत्तै अमेरिकी रक्षा मन्त्रालय पेन्टागनका प्रमुख म्याटिसले त्यस्तो प्रतिक्रिया दिएका हुन्।

ह्वाइट हाउसबाहिर संवाददाताहरुसँग बोल्लै रक्षा मन्त्री म्याटिसले अमेरिकासँग आफ्नो र दक्षिण कोरिया तथा जापान जस्ता आफ्ना मित्र देशको प्रतिरक्षा गर्ने सामर्थ्य रहेको बताए।

उनले भने, "अमेरिका र गुआम लगायतका भूभाग वा हाम्रा मित्र देशहरुविरुद्धका कुनै पनि खतरा उब्जिएमा त्यसविरुद्ध कडा सैन्य प्रतिक्रिया दिइनेछ। त्यो निकै प्रभावकारी र विनाशकारी हुनेछ।"


उसको त्यो कदमको अन्तर्राष्ट्रिय स्तरमा भर्त्सना भएको छ।

उत्तर कोरियाले संयुक्त राष्ट्रसंघीय प्रतिबन्ध र अन्तर्राष्ट्रिय दबाबको बेवास्ता गर्दै परमाणु अस्त्रको विकास गरेको छ। उसले आफ्ना परमाणु अस्त्र क्षेप्यास्त्रमा जडान गरेर अमेरिकी मुख्य भूभागसम्म पुर्याउन सकिने दाबी गरेको छ ।


उत्तर कोरियाद्वारा हाइड्रोजन बम परीक्षणको प्रशंसा


उत्तर कोरियाले भनेको छ उसले लामो दुरीको क्षेप्यास्त्रमा जडान गर्न मिल्ने परमाणु अस्त्रको सफल परीक्षण गरेको छ।

भूगर्भविदहरुले भूकम्प मापन गरेको केही घण्टापश्चात उसले आफ्नो छैठौं परमाणु अस्त्र परीक्षण 'पूर्णरुपमा सफल' भएको बताएको छ।

प्योङ्गयाङ्गले भनेको छ उसले यसपाली अणु बम भन्दा कैयौं गुणा शक्तिशाली हाइड्रोजन बम परीक्षण गरेको छ।


'उत्तर कोरियाको छैठौं आणविक परीक्षण' हाइड्रोजन बम बनाएको उत्तर कोरियाको दावी


विश्लेषकहरुले उसको भनाइलाई सतर्कतापूर्वक लिनुपर्ने भनेका छन्। तर पछिल्ला समयमा उत्तर कोरियाको परमाणु क्षमता बढ्दै गएको प्रस्टैसंग देखिन्छ।


क्षेप्यास्त्रमा जडान


यसभन्दा अगाडि उत्तर कोरियाले सन् २०१६ को सेप्टेम्बरमा परमाणु परीक्षण गरेको थियो।

संयुक्त राष्ट्रसंघको आर्थिक प्रतिबन्ध तथा अन्तर्राष्ट्रिय दबाब हुँदाहुँदै पनि उसले परमाणु अस्त्र तथा अमेरिकी मूल भूमिसम्म प्रहार गर्न सक्ने क्षेप्यास्त्रको परीक्षण गर्दै आएको छ।


दक्षिण कोरियाली अधिकारीहरुका अनुसार पछिल्लो परीक्षण उत्तर कोरियाको पुंग्ये रि परमाणु परीक्षण स्थल रहेको किल्जु काउन्टीमा गरिएको छ।

सो परीक्षणका कारण उत्पन्न भएको कृत्रिम भूकम्पको शक्ति उसले यसअघि पाँचौं परीक्षण ताका गरेको बेलाको भन्दा ९.८ गुणा बढी रहेको बताइएको छ।


प्योङ्गयाङ्गले लामो दुरीको क्षेप्यास्त्रमा जडान गर्न सकिने सानो आकारको हाइड्रोजन बम बनाएको बताएको केही घण्टापश्चात सो परीक्षण भएको छ ।