“स्थानिय चुनावमा तपाई हाम्रो मत परिवर्तनको लागि, समुन्नत र समृद्ध नेपालको लागि”

Posted on: April 06, 2017 | views: 1362

स्थानीय निर्वाचनको घोषणा भए लगत्तै जिल्ला जिल्लामा नेतृत्व कसले लिने र कस्तो राजनीतिक समीकरणबाट स्थानीय तहमा आफ्नो राजनीतिक पकड कायम गर्न सकिन्छ भनेर आन्तरिक गृहकार्य शुरु भैसकेको छ । लामो समयको अन्तरालपछि हुँदै गरेको यो स्थानीय निकायको निर्वाचन र संविधान निर्माणपछिको पहिलो महत्वपूर्ण निर्वाचन समेत भएकोले यस निर्वाचनलाई अत्यन्त महत्वका साथ हेरिएको छ । देश लामो समयसम्म द्धन्द र अस्थीर राजनीतिबाट गुज्रिरहेको बेलामा देशलाई आर्थिक समृद्धि र राजनीतिक स्थिरताको बाटोमा डोर्याउनको लागि भूमिका निर्वाह गर्नु आम सचेत नागरिकको कर्तव्य हो र यसै सन्दर्भमा केही महत्वपूर्ण सन्दर्भहरुलाई यस लेखमा उल्लेख गर्ने प्रयास गरिएको छ ।

(१) ऐतिहासिक अवसरलाई जनहीतमा उपयोग गरौं । 

देशका प्रमुख राजनीतिकक दलहरु पछिल्लो समयमा भागवण्डाको राजनीति र सत्ता केन्द्रित राजनीतिलाई प्रश्रय दिँदै जानु आम नेपाली जनताको लागि दुर्भाग्यको विषय भएको छ । पछिल्लो समयमा ग्रामीण भेगका यूवाहरु रोजगारीका लागि विदेशिनुपर्ने वा शहर पस्नुपर्ने वाध्यता र देशभित्रका शहरहरुमा व्यापक रुपमा चाप बढ्न गई गाउँ र शहरको बीचमा नै व्यापक रुपमा विकासको असन्तुलन बढ्दै गईरहेको सन्दर्भमा स्थानीय स्तरमा नै व्यापक अधिकार संविधानमा नै सुनिश्चित गरी र ७५ जिल्लाबाट ७४४ अधिकारसहितका स्थानीय निकाय गठन भईसकेपछिको निर्वाचनलाई आम नेपाली जनताको हीत र समृद्धिमा उपयोग गर्नको लागि इमान्दार, सक्षम, विकासप्रेमी र जनप्रेमी उम्मेदवारहरुलाई विजयी गराउनको लागि हामी सबैले प्रतिवद्धता जाहेर गरौं । 

(२) आफ्नो अमूल्य मत नबेचांै, देशको लागि मत प्रकट गरौं ।  

विश्वले विकास निर्माण र आर्थिक रुपमा व्यापक छलाङ मारिसकेको छ । हामी भने राजनीतिको नाममा देश चरम भ्रष्टाचार, वेथिति र राजनीतिक अस्थिरतालाई बढावा दिईरहेका छौं । चुनावको बेलामा कहिले एक वोतल रक्सी त कहिले एक प्लेट मासुको भरमा आफ्नो मतलाई बेचिरहेका छौं । चुनावको बेलामा हुने भोजभतेरहरु र व्यापक रुपमा जाँडरक्सीको विक्री हुने कुराले यसलाई पुष्टी गर्दछ । के हाम्रो मूल्य एक वोतल रक्सी र एक प्लेट मासु  हो त ? एक चोटि आँफैप्रति ईमान्दार भएर सोच्यौं भने अवश्य पनि आफ्नो मतलाई इमान्दार, सक्षम, विकासप्रेमी र जनप्रेमी उम्मेदवारहरुलाई विजयी गराउन उपयोग गर्नेछौं र यसमा प्रतिवद्धता जाहेर गरौं । 

(३) मतदान गर्दा विदेशिएका यूवाहरुको पीडालाई स्मरण गरौं 

नेपालको एउटा पूरानो लोकगीतलाई यहाँनेर स्मरण गरौं । “छोरो रुँदै रेलीमार्ई गोरपुर रेलैमा, आमा रुँदै रेलीमाई गाउँवेसी मेलैमा”, यो गीतले तत्कालीन नेपाली समाजको यथार्थ चित्रण गर्दछ । आज लाखौं यूवाहरु विदेशिईरहँदा र देश यिनै यूवाहरुको रगत र पसिनाले आर्जेको रेमिटेन्सबाट चल्दैगर्दा देशको राज्यसंयन्त्र र राजनीतिक दलहरुबाट वचेखुचेका यूवा, वृद्धा र सोझासाझा जनता र उनै विदेशिएका यूवाहरु देशभित्र स्थापित हुनै नसक्ने गरी देशमा अस्थिरता कायम गर्न उद्धत छन् । विदेशिएका यूवाको रेमिटेन्स चल्ने र उनै यूवाहरुको भोट नचल्ने नयाँ विभेद देशमा स्थापित  भएको छ । त्यसैले देश तथा विदेशमा रहेका आम नेपाली जनताहरुहरुको ढुकढुकीलाई सम्मान गर्नको लागि पनि आफ्नो मतलाई इमान्दार, सक्षम, विकासप्रेमी र जनप्रेमी उम्मेदवारहरुलाई विजयी गराउन उपयोग गरौं र यसमा प्रतिवद्धता जाहेर गरौं । 

(४) परिवर्तनको लागि, राजनीतिको खोलभन्दा माथि उठौं 

राजनीतिलाई जनताहरुलाई फरक फरक कित्तामा उभ्याउने र कुनै एउटा तप्काको बहुमत हाँसिल गरी सत्ता हत्याउन जनतालाई जात र धर्मको समेत खेती गर्ने देशमा लुटको धन्दालाई संस्थागत गर्न नेपालमा प्रयोग गरिएको छ । नातावाद, कृपावाद, चापालुसी, गुण्डागर्दीलाई संरक्षण गर्ने, देशका साधन स्रोतहरुलाई कब्जा गर्ने, माफियाको चंगुलमा पुर्याउने वा देशको हीत विपरित काम गरिरहेका विदेशी एजेण्टको प्रतिनिधि बनेर जनताको अभिमतलाई अधिकांश राजनीतिक दलहरुले दुरुपयोग गरिरहेका छन् । हाम्रै जीवनकालमा नेपाली समाजलाई समृद्ध र समुन्नत मुलुक बनाउने हो भने लगत्तै हुन लागेको स्थानीय निकायको निर्वाचनमा आँफूलाई यथास्थितिवादी र गलत राजनीतिक संस्कारबाट अलग गर्दै नितान्त राजनीतिको खोल भन्दा पनि विकास निर्माण र आर्थिक समृद्धिको गारेटोलाई आत्मसात गरी आफ्नो मतलाई इमान्दार, सक्षम, विकासप्रेमी र जनप्रेमी उम्मेदवारहरुलाई विजयी गराउन उपयोग गरौं र यसमा प्रतिवद्धता जाहेर गरौं । 

(५) राजनीतिक दललाई जिताउने होकि नेपाली जनतालाई रोजाई हाम्रै हो   

पछिल्लो समयमा स्वास्थ्य र शिक्षा जस्ता महत्वपूर्ण सामाजिक सुरक्षाका क्षेत्रहरुलाई व्यापारीकरण गरिएको छ । उद्योगधन्दाहरु कि त बन्द गरिएका छन् वा तथाकथित राजनीतिक दलहरुको नाममा उद्योगधन्दाहरुलाई सजिला चन्दादाताको रुपमा उपयोग गरिएको छ । जनताका अगाडि सस्तो लोकप्रियताको लागि ठूला ठूला कुरा गर्ने र भित्र भित्रै माफिया र विदेशी एजेण्टहरुका रुपमा राजनीतिक दलहरुले काम गर्ने परिस्थिति अन्त गराई देशमा समृद्धि सहितको सामाजिक न्याय स्थापित गराउनको लागि समेत तपाई हाम्रो मतलाई इमान्दार, सक्षम, विकासप्रेमी र जनप्रेमी उम्मेदवारहरुलाई विजयी गराउन उपयोग गरौं र यसमा प्रतिवद्धता जाहेर गरौं ।

आशा गरौं आगामी वैशाख ३१ गते हुँदै गरेको स्थानीय निकायको निर्वाचनले देशमा विकासका नयाँ ढोकाहरुलाई खोल्नेछ र स्थानीय स्तरमा नै विकास सहितका अधिकतम अधिकारहरु उपयोग गर्ने अवसर आम नेपालीहरुलाई मिल्नेछ । त्यसैले आफ्नो मतलाई इमान्दार, सक्षम, विकासप्रेमी र जनप्रेमी उम्मेदवारहरुलाई विजयी गराउन उपयोग गरौं र यसमा प्रतिवद्धता जाहेर गरौं ।


खिमानन्द कँडेल

काँठेखोला गाउँपालिका, वार्ड नं ५, बागलुङ

जय जुलुस ! : खिमानन्द कँडेल