च्याम्पियन्स कप फुटबलमा:बार्सिलोनाको संघर्षपूर्ण जित

Posted on: July 23, 2017 | views: 218

काठमाडौं, ।  इन्टरनेसनल च्याम्पियन्स कप फुटबलमा स्पेनिस क्लब बार्सिलोनाले इटालियन क्लब युभेन्टसलाई पराजित गरेको छ । अमेरिकाको न्यु जर्सीमा आइतबार विहान भएको खेलमा बार्सिलोनाले युभेन्टसमाथि २ – १ को जित निकालेको हो । न्यु जर्सी्स्थित मेटलाइफ स्टेडियममा भएको खेलमा बार्सिलोनालाई जित दिलाउन दुवै गोल नेयमारले गरे । युभेन्टसका जर्जियो चेलिनीले एक गोल फर्काए ।


खेलमा बार्सिलोनालाई जित दिलाउन नेयमारले दुवै गोल पहिलो हाफमा गरेका थिए । खेलको १५ औं मिनेटमा नेयमारले गोल गर्दै बार्सिलोनालाई सुरुवाती अग्रता दिलाएका थिए । त्यसपछि खेलको २६ औं मिनेटमा नेयमार ले ब्यक्तिगत दोस्रो गोल गर्दै बार्सिलोनालाई पहिलो हाफमा २ – ० को अग्रता दिलाए ।


यसै सिजन बार्सिलोना छाडेर फ्रान्सेली क्लब पेरिस सेन्ट जर्मेन ९पिएसजी० जाने हल्ला चलिरहेको बेला नै नेयमारले गोल गरेका हुन् । नेयमारलाई भित्राउन पिएसजीले १९६ मिलियन पाउण्ड तिर्न तयार रहेको बताउदै आएका छन् । तर, बार्सिलोनाले भने नेयमार क्लबमै रहने बताइसकेको छ ।


पहिलो हाफमा २ – ० ले पछि परेको युभेन्टसले दोस्रो हाफमा खेलमा फर्कने प्रयास गरेको थियो । खेलको ६३ औं मिनेटमा चेलिनीले गोल गर्दै खेल २ – १ मा ल्याए । तर, त्यसपछि थप गोल गर्न नसक्दा युभेन्टस २ – १ ले पराजित हुन् पुग्यो ।


युरोपियन फुटबलमा नयाँ सिजन सुरु हुनुअघिको प्रि सिजनको तयारीका लागि बार्सिलोना र युभेन्टस अमेरिकामा रहेका छन् । अमेरिकामा रहेको बार्सिलोनाले इन्टरनेसनल कप अन्तर्गत आगामी बिहिबार इंग्लिस क्लब म्यानचेस्टर युनाइटेडसँग खेल्ने छ । यस्तै युभेन्टसले पिएसजीको सामना गर्ने छ ।