नेपाल एसीसी इमर्जिङ नेशन्स कप क्रिकेटको समूह चरणबाटै बाहिरियो

Posted on: March 28, 2017 | views: 218

काठमाडौं, चैत १५ । एसीसी इमर्जिङ नेशन्स कप क्रिकेट प्रतियोगितामा नेपालले लगातार दोस्रो हार व्यहोरेको छ । बंगलादेशको शेख कमल अन्तर्राष्ट्रिय क्रिकेट रंगशालामा जारी खेलमा आयोजक बंगलादेशसँग ८३ रनले पराजित भएको हो । लगातार दोस्रो हारसँगै समूह चरणबाटै बाहिरिएको छ ।  बंगलादेशले दिएको २ सय ५८ रनको लक्ष्य पछ्याएको नेपालले ४२ ओभर ३ बलमा सबै विकेट गुमाउँदा १ सय ७४ रन मात्र बनायो । नेपालका दिपेन्द्र सिंह ऐरीले अर्धसतक बनाए । ६ चौकाको मद्धतमा उनले ८५ बलमा ५६ रन बनाएका हुन् । उनलाई दिलिप नाथले साथ दिएका थिए । दिलिपले ६२ बलमा ४१ रन बनाउँदा आउट भएपछि नेपालको ब्याटिङ सम्हालिन सकेन । १० बल खेलेका कप्तान ज्ञानेन्द्र मल्ल खाता नखोली आउट भएका थिए । १३ बल खेलेका अर्का ओपनर सुनिल धमला पनि एक रनमै आउट भएका थिए ।


यस्तै आशिफ शेखले १५ बलमा १२ रन बनाए । शरद भेषावकर ५ बलमा २ रन बनाएर आउट भए । मेहबुब आलम १७ बलमा १० रन बनाएर आउट भए । बिनोद भण्डारीले एक छक्का, ६ चौकाको मद्धतमा २३ बलमा ३३ रन बनाए । यस्तै भुवन कार्की १६ बलमा ६ रन बनाएर आउट भए ।  नेपालले टस जितेर पहिला फिल्डिङ गर्ने निर्णय गरेपछि ब्याटिङमा आएको बंगलादेशले निर्धारित ५० ओभरमा ९ विकेट गुमाएर २ सय ५७ रन बनाएको थियो । नेपालका अभिनाश कर्णले ३ तथा सन्दिप लामिछानेले २ विकेट लिए । यस्तै मेहबुब आलम, दिपेन्द्र सिंह ऐरी र ज्ञानेन्द्र मल्लले एक एक विकेट लिए ।


त्यसअघि पहिलो ब्याटिङ गरेको बंगलादेशले सुरुवाती तीनजना ब्याट्सम्यान सस्तैमा आउट भएपनि बंगाली कप्तान मोमिनुल हक र नसिर हुसेनले मध्यक्रमबाट इनिङ सम्हाल्दै टोलीलाई सम्मानजनक स्थितिमा पुर्‍याएका थिए । छैटौं नम्बरमा ब्याटिङमा आएका हुसेनले अविजित १०९ रनको शतकीय पारी खेले । उनले ११५ बलको सामना गरी १२ चौका र २ छक्का हिर्काएका थिए । एउटा एण्डबाट विकेट झरिरहँदा नसिर हुसेनले बंगलादेशको पारी सम्हाल्दै उत्कृष्ट ब्याटिङ गरे ।


नवौं विकेटका लागि उनले अब्दुल हसन राजुसँग मिलेर ७६ रनको साझेदारी गरेपछि बंगलादेशले ठूलो योगफल बनाउन सफल भएको थियो । अब्दुलले २९ रन बनाए ।२६औं ओभरमा युवा स्टार सन्दिप लामिछानेको बलमा आउट हुनुअघि कप्तान हकले पनि ६१ रनको अर्धशतकीय पारी खेलेका थिए । । उनले नसिरसग मिलेर पाचौं विकेटका लागि ७८ रनको ठोष साझेदारी गरेका थिए ।


सोमबार भएको पहिलो खेलमा नेपाल पाकिस्तानसँग ६ विकेटले पराजित भएको थियो । एसियाली क्रिकेट परिषद एसिसीको आयोजनामा भइरहेको प्रतियोगितामा चार एशोसिएट राष्ट्र नेपालसँगै अफगानिस्तान, मलेसिया र हङकङ तथा टेष्ट मान्यताप्राप्त राष्ट्र पाकिस्तान, भारत, बंगलादेश र श्रीलंकाका २३ वर्षमुनिका खेलाडीको सहभागिता छ ।


नेपाल रहेको समूह ‘ए’ मा पाकिस्तान, बंगलादेश र हङकङ तथा समूह ‘बी’ मा भारत, श्रीलंका, मलेसिया र हङकङ छन् ।  अब नेपालले समूह चरणको अन्तिम खेलमा बिहीबार हङकङसँग खेल्नेछ । इमर्जिङ कपको दोस्रो चरणमा पुग्न नेपाललाई बगंलादेशसँगको खेल जित्नैपर्ने दबाब थियो । तर, लगातार दुई खेल गुमाएसँगै नेपालको सम्भावना सकिएको हो । नेपाल सोमबार भएको पहिलो खेलमा पाकिस्तानसँग पनि ६ विकेटले पराजित भएको थियो । समूह चरणको खेलपछि समूहको दुई शीर्ष टोली दोस्रो चरणमा पुग्नेछन् ।