मेस्सी चम्किएपछि सेल्टा डि भिगोको पोष्टमा गोलको वर्षा

Posted on: March 05, 2017 | views: 231

एजेसी,फागुन २२ । स्पेनिस ला लिगा लिडर बार्सिलोनाले फेरि अर्को शानदार जित दर्ता गरेको छ । लिग अन्तर्गत शनिबार राति भएको खेलमा बार्सिलोनाले सेल्टा डि भिगोलाई ५–० ले हरायो । घरेलु मैदान क्याम्प नाउमा भएको खेलमा बार्सिलोनालाई जिताउन लियोनल मेस्सीले दुई तथा नेइमार, इभान रेकिटिक र स्यामुएल उमटिटीले एक एक गोल गरे । 


२४ औं मिनेटमा मेस्सीले गोल गर्दै बार्सिलोनालाई सुरुवाति अग्रता दिलाए । ४० औं मिनेटमा नेइमारले गोल गरेपछि पहिलो हाफमा बार्सिलोनाले २–० को अग्रता लियो । ५७ औं मिनेटमा रेकिटिक तथा ६१ औं मिनेटमा उमटिटीले गोल गरेपछि बार्सिलोनाको अग्रता ४–० मा पुग्यो । 


६४ औं मिनेटमा मेस्सीले व्यक्तिगत दोस्रो गोल गर्दै बार्सिलोनालाई ५–० को शानदार जित दिलाए । मेस्सीले यो सिजन ला लिगामा अहिलेसम्म २३ गोल गरिसकेका छन् । सात गोलका लागि सहयोग गरेका उनी सर्वाधिक गोलकर्ताको सूचिमा शीर्ष स्थानमा छन् । जितपछि शीर्ष स्थानको बार्सिलोनाको २६ खेलबाट ६० अंक भएको छ । बार्सिलोना दोस्रो स्थानको रियल मड्रिड भन्दा एक अंकले अघि छ । एक खेल कम खेलेको रियल मड्रिडको ५९ अंक छ ।