नेपाललाई पहिलो स्तरको खेल खेल्न दिने आइसीसीको प्रस्ताव

Posted on: December 17, 2016 | views: 648

१ पुस, काठमाडौं ।
माथिल्लो स्तर अर्थात् पहिलो र्यांकिगंमा रहेर अष्ट्रेलिया, बंगलादेश, पाकिस्तान, भारत लगायत देशले खेल्दै आएको स्तरको खेल खेल्न दिन अन्तराष्ट्रिय क्रिकेट काउन्सिल आईसीसीले प्रस्ताव गरेको छ ।

नेपालसहित टप एशोसिएट देशलाई पनि माथिल्लो स्तरको क्रिकेट खेल्ने मौका दिने आईसीसीले प्रस्ताव गरेको हो ।

पूर्ण सदस्य राष्ट्रको संख्या बढाउन आईसीसीले गृहकार्य गरिरहेको आईसीसीका सीईओ डेभिड रिचार्डसनले बताएका छन् । उनका अनुसार माथिल्लो स्तरको क्रिकेट खेल्ने देशको संख्या १५(१६ बनाउने शशांक मनोहरको नेतृत्वमा आईससीसीले काम गरिरहेको छ ।

श्रीलंका क्रिकेट र एसीसी अध्यक्षको निम्तोमा कोलम्बो पुगेका आईसीसी सीईओ रिचार्डसनले भने, लामो समयदेखि हामीसँग १० पूर्ण सदस्य छन् ।

यदि हामी आफैंप्रति इमान्दार हुने हो भने ८ वा सम्भवत ९ टिमले माथिल्लो लेभलको क्रिकेट खेल्छ ।’ उनले अघि भने, हामी अफगानिस्तान, नेपाल, मलेसिया र अरु थुप्रै एसियन क्षेत्रका देशलाई समावेश गरेर यो संख्यालाई १५/१६ बनाउन चाहन्छौं ।’

आईसीसीमा यसअघि पनि टप एशोसिएट टिमलाई समावेश गरेर टेष्ट क्रिकेटमा दुई डिभिजन बनाउन छलफल भएको थियो । तर, भारत, बंगलादेशसहितका देशले विरोध गरेपछि यो प्रस्ताव तुहिएको थियो ।