विश्वकप क्रिकेट छनौटमा नेपाली महिला टोलिले चीनलाई हरायो

Posted on: October 11, 2016 | views: 371

२५ असोज, काठमाडौं ।
आइसिसी महिला विश्वकप क्रिकेटको एसियाली छनौटको तेस्रो खेलमा नेपालले चीनलाई पराजित गरेको छ ।

मंगलबार भएको खेलमा पहिलो जित दर्ता गराउँदै नेपालले चीनलाई २० रनले हराएको हो ।

नेपालले प्रस्तुत गरेको ९६ रनको सामान्य लक्ष्य पछ्याएको चीनले निर्धारित २० ओभरमा मात्र ८ विकेटेको क्षतिमा ७५ रनमात्रै बनाउन सक्यो ।

चीनकी वु जुएनले ११ तथा जोउ मिएओ र लि यिङयिङले समान १० रन बनाउनु बाहेक अरुले दोहोरो अंकमा रन बनाउन सकेनन् । नेपालकी सीता राना मगरले तीन तथा सबनम राईले दुई विकेट लिइन् ।

हङकङको कोवलुनमा टस जितेर पहिले ब्याटिङ गरेको नेपालले निर्धारित २० ओभरमा ९ विकेटको क्षतिमा ९५ रन बनायो ।

नेपालका लागि नेरी थापाले सर्वाधिक ३८ रन बनाइन् । यस्तै निर्मला कुमारी शाहीले १४ तथा ज्योती पाण्डेले १० रन बनाइन् ।
जारी प्रतियोगितामा नेपाल पहिलो खेलमा आयोजक हङकङसँग र दोस्रो खेलमा थाइल्याण्डसँग पराजित भएको छ ।

प्रतियोगितामा आयोजक हङकङसहित नेपाल, चीन र थाइल्याण्ड सहभागी छन् । डबल राउन्ड रोबिन लिगका आधारमा हुने प्रतियोगितामा शीर्ष स्थानमा रहने टोलीले ग्लोबल क्वालिफायर अर्थात विश्वभरिका टिम सहभागी हुने छनौट प्रतियोगितामा भाग लिन पाउनेछ ।

नेपालले अघिल्लो चरणमा पुग्न बाँकी खेल जितेर मात्र पुग्दैनकी अन्य खेल समेत आफ्नो पक्षमा हुनेगरि हार जित हुनुपर्ने देखिन्छ ।