रुकुममा १६ वर्ष मुनिको खुल्ला भलिबल प्रतियोगीता हुँदै

Posted on: September 22, 2016 | views: 223

६ असोज, रुकुम ।
दशैं, तिहार लगाएतका चाडवर्पहरु नजिकिए संगै रुकुममा विभिन्न खेलकुद प्रतियोगीता आयोजना हुने क्रम बढेको छ । चाड पर्वलाई लक्षित गर्दै विभिन्न संघ संस्था र क्लवहरुले प्रतियोगीता आयोजना गर्ने गरेका छन् ।

२ साता अगाडी मात्र १६ वर्ष मुनिको फुटबल प्रतियोगीता संचालन भएको सदरमुकाम मुसिकोटमा १६ वर्ष मुनिकै भलिबल प्रतियोगीता पनि संचालन हुन लागेको छ । यनाईटेड अण्डर सिस्टिन भलिबल संरक्षण समिति रुकुमले प्रतियोगीता संचालन गर्न लागेको हो ।

जिल्लामा रहेका बाल खेलाडीहरुको प्रतिभा प्रस्फुटन गर्ने र क्षमतावान खेलाडी उत्पादन गर्ने उद्ेश्यका साथ प्रतियोगीता आयोजना गरिएको आयोजक समितिका अध्यक्ष नरेश पुनमगरले जानकारी दिए । प्रतियोगीता असोज १० गतेबाट मुसिकोट नगरपालिका १ खलंगाको बह्राटाकुरा टँडिखेलमा हुने छ । प्रतियोगीतामा प्रथम हुनेले १५ हजार, द्धितियले ११ हजार र तृतिय स्थान हासिल गर्ने समुहले ८ हजार नगद, मेडल र प्रमाण पत्र प्राप्त गर्ने छन् ।

प्रतियोगीतामा सहभागीताका लागी १२ सय दर्ता शुल्क तोकिएको र खेलाडीहरु अनिवार्य खेल पोशाक, जन्म दर्ता र परिचय पत्रका साथ उपस्थित हुनुपर्ने आयोजकले जानकारी दिएको छ ।

जिल्लाकै पहिलो प्रतियोगीता
१६ वर्ष मुनिको भलिबल प्रतियोगीता जिल्लाकै पहिलो भएको समितिका अध्यक्ष पुनले दाबी गरे । जिल्लामा यसअघि ठुल–ठुला भलिबल प्रतियोगीता भैसकेका छन् उनले भने, ‘तर ठुला प्रतियोगीताका लागी खेलाडी उत्पादन गर्ने तर्फ कसैको ध्यान नगएपछि प्रतियोगीता संचालन गर्ने प्रयास गरेका हाँै ।’

सधैं ठुला ठुला कुरामा मात्र ध्यान दिईदा साना साना पक्ष ओझेलमा पर्ने भएकाले विद्यालय स्तरबाटै खेलाडी उत्पादन गर्ने उद्ेश्यका साथ समिति गठन गरेको र त्यसै अनुरुप प्रतियोगीता संचालन हुन लागेको उनको भनाई रहेको छ । प्रतियोगीता पछि जिल्लामा विद्यालय स्तरबाटै खेलाडी उत्पादनमा एउटा लहर नै सृजना हुने विश्वास समेत आयोजकले लिएको छ ।

भलिबलमा मध्यपश्चिम च्याम्पिएन रुकुम  
भलिबलमा रुकुम मध्यपश्चिम च्याम्पिएन हो । जिल्लामा भलिबलको राम्रो सम्भावना र क्रेज पनि छ । रुकुमले २०६८ मा भएको क्षेत्रिय खेलकुद प्रतियोगीताको पुरुष भलिबलमा उपाधी जितेको थियो । त्यसपछि अन्तर जिल्ला स्तरिय कुनै प्रतियोगीतामा रुकुमले सहभागीता जनाएको छैन् । जिल्लामा भने विभिन्न संघ संस्था र क्लवहरुको आयोजनामा वर्षमा १, २ ओटा प्रतियोगीता हुने गरेका छन् ।

खेलाडीहरुलाई व्यवशायीक बनाउन नसकिदा जिल्लामा रहेका भलिबल खेलाडीहरुको संरक्षण हुन नसकेको खेलकुदमा सक्रिय समृद्ध समाज नेपालका अध्यक्ष सुवोधराज शेर्पाली बताउछन । सरकारले नै खेलाडीहरुलाई व्यावसायिक बनाउन पहल थाल्नुपर्ने उनको भनाई रहेको छ ।  

जिल्लामा चाडपर्व र मेलाको अवसरमा आयोजना गरिएका प्रतियोगीताहरुले नै जिल्लाको भलिबललाई धानेको छ भन्दापनि फरक नपर्ने खेलप्रेमीहको भनाई । यस्तो अवस्थामा विद्यालय स्तरबाटै खेलाडीको पहिचान गर्न सकियो भने जिल्लाको भलिबललाई अझै माथि उकास्न सकिने यनाईटेड अण्डर सिस्टिन भलिबल संरक्षण समितिको ठहर छ ।