राष्ट्रिय महिला भलिबलको उपाधि न्यु डायमण्डलाई

Posted on: September 04, 2016 | views: 293

पोखरा, भदौ १९ । न्यु डायमन्ड एकेडेमीले लगातार चौथो पटक लामाचौरमा भएको राष्ट्रिय महिला भलिबलको उपाधि जितेको छ । आइतबार डायमन्डले विभागिय टोली शसस्त्र प्रहरी बलको एपिएफ क्लबलाई ३०–२८, २५–१५ र २५–२० ले हरायो । डायमन्डको जितमा सर्वाधिक स्कोर जोडेकी प्रतिभा मालीले २५ स्कोर गरिन । यसैगरी डायमन्डकी कप्तान ललिता नाथले ८ स्कोर गरिन । पनमिका राईले ७ स्कोर गरिन ।

आइतबार पोखरा लामाचौरमा भएको खेलमा डायमन्डी सेटर कृपा अधिकारी, लिबेरो सलिना श्रेष्ठले उत्कृष्ट प्रदर्शन गरेको थिए ।  समिक्षा घिमिरेले डिफेन्समा उत्कृष्ट बचाउ गरिन । सबिता लोले सर्भिसबाट ३ अंक लिदै एपिएफका खेलाडीलाई निराश बनाएकी थिइन ।

यसैगरी एपिएफले भने पुन एक पटक लामाचौरमा खराब प्रदर्शनलाई निरन्तरता दियो । एपिएफ यसप्रतियोगितमा मुख्य स्पाइकर सरस्वती चौधरी बिना खेलिरहेको छ । एपिएफकी

रेश्मा भण्डारीले १२ स्कोर, नेविका चौधरीले १२ र उषा विष्ट ५ स्कोर गरेपनि टोलीलाई हारबाट जोगाउन सकेनन ।

न्यु डायमन्डका प्रशिक्षक कुमार राईले टोलीले आफनो पुरानो साखलाई पुन फर्काएको बताए । उनले भने, एपिएफसँग हामी धेरै जसो प्रतियोगितामा हार्ने गरेको छौं । तर लामाचौरमा हामी सधै एपिएफलाई पराजित गछौं । पुन एक पटक त्यो नतिजा दोहोरिदा खेलाडीको मनोबल बढेको छ । खुसी छौं । यही लयलाई निरन्तरता दिने प्रयास गर्नेछौं ।

यसैगरी कप्तान ललिता नाथले टिमले आफनो स्वभाविक खेल खेलेपछि घरेलु भलिबलमा नम्बर एक हुन समस्या नहुने बताइन ।  

उनले भनिन, सबैले आज उत्कृष्ट खेले । यसले हाम्रो मनोबल बढेको छ । एनभिए कपमा राम्रो नतिजा निकाल्न सहयोग गर्नेछ । बिधागत उत्कृष्टमा पनि न्यु डायमण्डनै हाबी भयो ।

प्रतियोगिताको सर्वोकृष्ट खेलाडिको उपाधि प्रतिभा मालीले जितिन् । यसैगरी उत्कृष्ट क्विकर डायमन्डकी ललिता नाथ, उत्कृष्ट सेटर कृपा अधिकारी, उत्कृष्ट डिफेन्स सलिना श्रेष्ठ र उत्कृष्ट प्रशिक्षक कुमार राई चुनिय ।

एपिएफकी रेश्मा भण्डारी उत्कृष्ट स्पाइकर बन्दा आर्मीकी मनिषा खाँड उत्कृष्ट ब्लकर चुनिइन । पश्चिमाञ्चलको टप्स स्कुलकी अरुणा शाही उत्कृष्ट सर्भरबाट सम्मानित भइन ।

यसैैगरी घरेलु टोेली पश्चिमाञ्चलको टप्स स्कुलले त्रिभुवन आर्मी क्लबलाई सोझो सेटमा हराउँदै तेस्रो स्थान हासिल गरेको छ । टप्सले आर्मीलाई २५–१६, २५–१२, २५–१५ ले हरायो । टप्सको जितमा स्पाइकर अरुणा शाहीले उत्कृष्ट प्रदर्शन गरिन ।

प्रतियोगिताको विजेता डायमन्डले ७५ हजार, एपिएफले ५० हजार र टप्सले २० हजार रुपैया पायो ।

विजेतालाई आयोजक नवआदर्श सामुदायिक विकास समाजका अध्यक्ष धर्ममान सिंह भण्डारीले, नेपाल भलिबल संघका महासचिव जितेन्द्र बहादुर चन्द, आयोजक संस्थाकी सचिव लक्ष्मी क्षेत्री पाण्डे लगायतले पुरस्कृत गरे ।