निशा १ अंकले चुक्दा ओलम्पिकमा नेपालको पदक सपना समाप्त

Posted on: August 21, 2016 | views: 718

५ भदौ, काठमाडौं ।
तेक्वान्दोकी निशा रावल रियो ओलम्पिकको प्रतिस्पर्धामा पदक बिहिन भएर बाहिरिएकी छिन् ।

नेपालको तर्फवाट अन्तिम खेलाडीका रुपमा तेक्वान्दोमा प्रतिस्पर्धा गरेकी निशा रावल एक अंकले चुक्दा ओलम्पिकमा पदक बिहिन बनेको नेपालको दाग रियो ओलम्पिकले पनि मेट्न सकेन ।

कास्य पदकका लागि फ्रान्सकी ग्वाल्डिज इपान्गुईसँगको भिडन्तमा निशा एक अंकले चुक्दा प्रतिस्पर्धाबाटै बाहिरिन पुगिन् ।

आइतवार बिहान ब्राजिलको रियोस्थित कारिओका एरिना–३ मा भएको खेलमा निशाले सन् २००८ को बेइजिङ ओलम्पिककी कास्य विजेता फ्रेन्च खेलाडीसँग भिडन्त गरेकी थिइन् ।

भिडन्तमा तेस्रो बाउटमा फ्रेन्च खेलाडीसँग १ अंक गुमाउन पुग्दा निशा दूर्भाग्यपूर्ण रूपमा हार्न पुगिन् ।

६७ केजी माथि हेभिवेट स्पर्धामा निशाले पहिलो बाउटमा ३ अंक गुमाउन पुगेकी थिइन् । तर, दोस्रो बाउटमा आक्रामक देखिएकी निशाले ३ अंक बटुल्दै इपान्गुईसँगको खेल ३–३ को बराबरीमा पुर्याएकी थिइन्।
 
निशा रेपेचार्ज राउन्डअन्तर्गत कास्य पदकका लागि फ्रेन्च खेलाडीसँग भिडेकी थिइन् ।

एक अंकले चुकेकी निशाको नेपालबाट ओलम्पिक खेलेका अन्य २ खेलाडीभन्दा उत्कृष्ट रहेको पाइएको छ ।

२० वर्षीय निशाभन्दा अघि सन् २००४ को एथेन्स ओलम्पिकमा संगीना बैध र सन् २००८ को बेइजिङ ओलम्पिकमा दीपक बिष्ट भिडेका थिए ।

दुवै तेक्वान्डो खेलाडी नेपालमा उत्कृष्ठ तेक्वान्दो खेलाडीका रुपमा चिनिन्छन् । हाल दुवैले खेल जिवनबाट सन्यास लिइसकेका छन् भने तेक्वान्दो खेल क्षेत्रमै क्रियाशिल रहेका छन् ।