जापानकी काओरी कुस्तीमा चार स्वर्ण जित्ने पहिलो महिला खेलाडी (ओलम्पिक विशेष)

Posted on: August 18, 2016 | views: 334

२ भदौ, एजेन्सी ।
ब्राजिलमा जारी रियो ओलम्पिकमा जापानकी कुस्ती खेलाडी काओरी ईको लगातार चार वटा आलम्पिकमा स्वर्ण पदक प्राप्त गर्ने पहिलो महिला बनेकी छिन् ।

रियो दि जेनेरियो शहरमा बुधबार राती सम्पन्न ५८ केजी तौल समूहको फ्रि स्टाईल कुस्तीमा ईको ले रुषकी भलेरिया कोबलोभालाई पराजित गरेकी थिईन् ।

यो स्वर्ण संगै दश पटक विश्व विजयी भएकी ३२ वर्षीय ईकोले आफ्नो १३ वर्षिय अविजित यात्रालाई पनि निरन्तर्ता दिएकी छिन् ।

यसै स्पर्धामा भारतकी साक्षी मल्लिकले भारतका लागि पहिलो काँस्य पदक जितेकी थिईन् ।

साक्षी ओलम्पिकमा भारतका लागि पदक प्राप्त गर्ने प्रथम महिला बनेकी छिन् भने दक्षिण एशियाली खेलकुदको माहारथी भारतको रियो ओलम्पिकमा यो नै पहिलो पदक पनि हो ।

बुधबार राती नै भएको पुरुष फुटबलको पहिलो सेमिफाईनलमा ब्राजिलका फुटबल हस्ती नेमारले अ‍ेलम्पिक ईतिहासमा सबै भन्दा चाँडो गोल गर्ने नँया कीर्तिमान रचेका छन् ।

नेमारले खेल शुरुभएको १४ सेकेण्डस्मा गोल गर्दै यसै रियो ओलम्पिकको महिला छनोट चरणमा क्यानडाकी जेनि बेकरले अष्ट्रेलिया बिरुद्धको खेलमा २० सेकेण्डस्मा गोल गर्दै बनाएको कीर्तिमान भङ्ग गरेका थिए ।

यो पहिलो सेमिफाईनलमा ब्रजिलले होन्डुरसलाई ६/० गोलको विशाल अन्तरले पराजित गर्दै फाईनलमा स्थान बनाएको थियो ।

दोस्रो सेमिफाईनलमा जमर्नीले नाईजेरियालाई २/० गोल अन्तरले पराजित गर्दै फाईनलमा प्रवेश गरेको थियो ।

चिनले बुधबार राती सम्पन्न टेबल टेनिसको टिम ईभेन्टस्मा स्वर्ण जिते संगै रिओ ओलम्पिकमा टेबल टेनिसको सबै ४ वटा स्वर्ण हात पारेको छ ।

सन् १९८८ को शिओल आलम्पिकमा टेबल टेनिस समावेश गरिए देखि चिनले अहिले सम्मको ओलम्पिकमा भएका कुल ३२ वटा फाईनलमा २८ मा स्वर्ण पदक हात पारेको छ ।

जमाईकाकी धाविका यलेन थोम्पशनले २ सय मिटर्स दौडमा स्वर्ण जितिन् ।

थोम्पशनले यसै ओलम्पिको १ सय मिटर्स दौडमा पनि स्वर्ण हात पारेकी थिईन् ।

बिहिबार बिहानको खेल सम्पन्न हुँदा सम्म अमेरिका ३० स्वर्ण पदकका साथ शीर्ष स्थानमा कायमै रहेको छ ।

यसैगरि १९/१९ स्वर्ण पदकका साथ बेलायत र चिन क्रमस दोस्रो र तेस्रो स्थानमा रहेका छन् भने १२/१२ स्वर्ण पदकका साथ रुष र जर्मनी क्रमस चौथो र पाँचौ स्थानमा रहेका छन् ।