जर्मनी भर्सेस इटाली,कसले मार्ला बाजी ?

Posted on: July 02, 2016 | views: 410

 १८  असार, काठमाडौं ।  

युरोकप फुटबल अन्तर्गत शनिबार हुने तेस्रो क्वार्टरफाइनलमा आज विश्वको ध्यान तानिएको छ । शनिवार मध्यराति विश्व विजेता जर्मनीले इटालीको सामना गर्दैछ। युरोकपमा फाइनलको संज्ञा दिएको यो खेल निकै प्रतिस्पर्धात्मक हुनेछ।  इतिहासमा जर्मनीविरुद्ध इटली हाबी भएको छ। अहिलेसम्म भएको ३३ खेलमा इटलीले १५ खेलमा जित हात पारेको छ भने जर्मनीले ८ खेल मात्र जितेको छ। बाँकी १० खेल बराबरीमै सकिएका छन्। गत मार्चमा भएको मैत्रीपूर्ण खेलमा भने जर्मनीले इटलीलाई ४–१ ले हराएको थियो। आजभने जर्मनी बलियो  मानिएको छ । 


नेपाली समय अनुसार राति पौने एक बजे हुने खेलमा डिफेन्डिङ च्याम्पियन स्पनेलाई क्वाटरफाइनलमा हराएको इटाली र स्लोभाकियालाई रोक्दै अन्तिम ८ मा आएको जर्मनीसँगको खेल अत्यान्तै रोमाञ्चक हुने फुटबल पण्डितहरू बताउँछन्।  युरोकपमा भएको चारै खेलमा इटली अपराजित छ। विश्व फुटबलमा जर्मनी सर्वाधिक सफल राष्ट्रमध्ये एकमा पर्छ। विश्वकप र युरोकप दुवैमा सर्वाधिक पटक फाइनल पुग्ने रेकर्ड जर्मनीको नाममा छ। तर इटलीविरुद्ध भने जर्मनी सधैं कमजोर बन्दै आएको छ। 


जर्मनी स्पेनसँगै तीन पटकको युरो च्याम्पियन हो भने इटली एक पटकको च्याम्पियन। विश्व विजेताको हैसियतमा फ्रान्स पुगेको जर्मनीलाई उपाधिको दाबेदारको रुपमा हेरिए पनि इटलीलाई कसैले उपाधिको दाबेदार टोली मानेको थिएन। तर क्वाटरफाइनलसम्म आइपुग्दा इटलीले जुन खालको प्रदर्शन गरेको छ, फुटबल पण्डितहरुले भन्न थालेका छन् कि इटली पनि अब उपाधिको दाबेदार हो।


जर्मनी पछिल्ला पाँच खेलमा अपराजित छ। त्यसमा यो युरोकपका चार खेल पनि समावेस छन्। सन् १९७२, १९८० र १९९६ को विजेता जर्मनी सन् २००४ को युरोकपमा भने समूह चरणबाटै बाहिरिएको थियो। इटाली आफ्ना पछिल्ला ६ खेलमा पाँचमा विजयी छ। युरोकपको अन्तिम चरणमा इटालीको यो नवौं सहभागिता हो। सन् १९९२ को युरोकपमा नखेलेको इटाली अहिलेसम्म दुई पटक (१९९६ र २००४) मात्रै समूह चरणबाटै बाहिरिएको छ। सन् १९६८ को विजेता इटाली २००० र २०१२ को उपविजेता हो।


खेल हुने समय : मध्यरात १२:४५ बजे

खेल हुने स्थान : स्टेड डे बोर्डे, बोर्डे

हेर्नलायक खेलाडी : जेरोम बोएटेङ-जर्मनी, ग्राजियानो पेल्ले-इटली

हेड टु हेड : जर्मनी ८, इटली १५, बराबरी १०

रेफ्री : भिक्टोर कसाई, हंगेरी

युरो सहभागिता : जर्मनी १२, इटली ९

फिफा वरियता : जर्मनी ४, इटली १२

मुख्य उपलब्धि : जर्मनी विजेता सन् १९७२, १९८०, १९९६

इटली विजेता : सन् १९६८