नाटकीय जित निकाल्दै आइसल्याण्ड पहिलो सहभागितामै नकआउट चरणमा

Posted on: June 23, 2016 | views: 141

एजेन्सी,असार ९ । अष्ट्रियामाथि नाटकीय जित निकाल्दै  पहिलो सहभागितामै समूह उविजेता बन्दै आइसल्याण्ड युरोकप फुटबलको नकआउट चरणमा प्रवेश गरेको छ । बुधबार राति भएको समूहको आफ्नो अन्तिम खेलमा आइसल्याण्डले अस्ट्रियालाई २–१ ले हराएको छ । जितसँगै तीन खेलबाट ५ अंक जोडेको आइसल्याण्ड समूह एफका उपविजेता बनेको छ । र, अब अन्तिम १६ मा इंग्ल्याण्डको सामना गर्ने भएको छ ।

आइसल्याण्डलाई महत्वपूर्ण जित दिलाउन इन्जुरी समयमा आरनोर इनग्भी ट्रउस्तासनले गरेको गोल निर्णाक बन्यो । आइसल्याण्डले १८ मिनेटमा जोन डाडी बोड्भार्सनले गोल गरेपछि सुरुवाति अग्रता लिएको थियो । तर ६० औं मिनेटमा एलेसान्ड्रो सोफले अस्ट्रियाका लागि बराबरी गोल फर्काए । १–१ को बराबरीमा पुगेको अवस्थामा आइसल्याण्डका आरनोरले इन्जुरी समयमा गोल गर्दै जित दिलाए । 

अस्ट्रियाले गोल गर्ने केही सुन्दर मौका गुमाएको थियो । बलमा ७० प्रतिशत भन्दा बढी नियन्त्रण रहेर पनि खेल अस्ट्रियाको पक्षमा आउन सकेन र अस्ट्रिया समूह चरणबाटै बाहिरिन बाध्य भयो । दुई खेलमा बराबरी र एकमा जित निकालेका आइसल्याण्ड पाँच अंकसहित उपविजेता बन्यो । अघिल्ला खेलमा आइसल्याण्डले पोर्चुगल र हंगेरीलाई समान १–१ को बराबरीमा रोकेको थियो ।

पोर्चुगललाई गोलरहित बराबरीमा रोकेको अस्ट्रिया हंगेरीसँग २–० ले हारेको थियो । आइसल्याण्ड युरोकप खेल्ने अहिलेसम्मकै सानो देश हो । त्यहाँको जनसंख्या ३ लाख ३० हजार मात्र छ । तर, उसले पहिलो सहभागितामा नै युरो कपको नकआउट चरणमा पुगेको छ ।