टर्कीलाई हराउँदै क्रोएसियाको विजयी सुरुवात

Posted on: June 12, 2016 | views: 313

काठमाडौं,जेठ ३० । टर्कीलाई पराजित गर्दै क्रोएसियाले युरो कप फुटबलमा विजयी सुरुवात गरेको छ । आइतबार भएको खेलमा क्रोएसियाले टर्कीलाई १-० गोलले हराउँदै २००८ को युरोको क्वार्टरफाइनलमा व्यहोरेको हारको बदला लिएको छ । पेरिसमा भएको खेलमा लुका मोडरिचले ४१ औं मिनेटमा गरेको गोल नै निर्णायक बन्यो ।उनले करिव २५ यार्ड टाढाबाट भली गोल गरेका हुन् ।  चौथो पल्ट युरो कप खेलिरहेको र सन् २००८ मा सेमिफाइनलसम्म पुगेको टर्कीले भने गोल गर्ने खासै मौका बनाउन सकेन । 

टर्कीलाई हराउने क्रोएसिया भने सन् १९९६ र २००८ मा क्वाटरफाइनलसम्म पुगेको थियो । १ गोल गरेको क्रोएशियाले १८ पटक टर्कीको पोष्टमा आक्रमण गरेको थियो, जस मध्येका ६ प्रहार गोल लक्षित थिए । तर टर्कीले भने जम्मा ९ पटक मात्र क्रोएशियाको पोष्टसम्म बल लैजान सक्यो र २ पटक मात्र गोलका लागि लक्षित गरेर प्रहार गरेको थियो । यो समूहमा रहेका स्पेन र चेक गणतन्त्रबिचको खेल सोमबार हुने छ । आइतबारको विजेता क्रोएशियाले चेक गणतन्त्रसँग र टर्कीले स्पेनसँग आउँदो शुक्रबार खेल्ने छ ।