एबिडि उत्कृष्ट प्रदर्शनले बैंग्लोर आइपिएलको फाइनलमा

Posted on: May 25, 2016 | views: 333

एजेन्सी,जेठ १२ । एबिडि भिलियर्सको उत्कृष्ट प्रदर्शनले रोयल च्यालेन्जर्स बैंग्लोर इन्डियन प्रिमियर लिग आइपिएलको फाइनलमा प्रवेश गरेको छ । मंगलबार राति भएको पहिलो क्वालिफाएरमा गुजरात लायन्सलाई ४ विकेटले हराउँदै  बैंग्लोर आइपिएलको फाइनलमा प्रवेश गरेको हो ।  गुजरातले दिएको १ सय ५९ रनको लक्ष्य पछ्याएको बैंगलोरले १० बल बाँकी छँदै ६ विकेट गुमाएर भेट्टाएको हो। रोयल च्यालेन्जर्स बैंगलोरको जितमा एबिडीभिलियर्स नायक भए।


टिमको खातामा २९ रन हुँदा ५ विकेट गुमाइसकेको बैंगलोरलाई फाइनलसम्म पुर्‍याउन एबिडिभिलियर्सले उत्कृष्ट पारी खेल्दै  ४७ बलमा पाँचा चौका र पाँच छक्काको मद्दतमा नटआउट ७९ रन बनाए । यस्तै इकबाल अब्दुल्लाहले २५ बलमा ३३ रन बनाए । कप्तान विराट कोहली शुन्य तथा क्रिस गेल ९ रन बनाउँदा आउट भएका थिए । यस्तै शेन वाट्सन एक रन बनाएर आउट भए । बैंग्लोरको २९ रन बनाउँदा पाँच विकेट गुमाएको अवस्थालाई भिल्लियर्सले सम्हाले । 


गुजरातका धवल कुलकर्णीले चार विकेट लिए ।टस हारेर पहिले ब्याटिङ गरेको गुजरातले निर्धारित २० ओभरमा सबै विकेट गुमाउँदै १५८ रन बनाएको थियो। गुजरातले सुरुवाती तीन विकेट मात्रै ९ रन बनाउँदा गुमाएको थियो । त्यसपछि डवेन स्मिथले ४१ बलमा ७३ रन बनाएर गुजरातलाई सम्मान जनक स्कोरमा पुर्‍याए । पराजित भएको गुजरातले फाइनल प्रवेशका लागि फेरि एक पटक प्रयास गर्न पाउने छ । जितसँग बैंगलोरले आइपिएलको फाइनल समेत होम ग्राउण्डमा खेल्ने मौका पाउनेछ।

बैंगलोरसँग पराजित भएपनि गुजरात प्रतियोगितामा कायमै छ। उसले अब फाइनल प्रवेशका लागि आज हुने सनराइजर्स हैदरावाद र कोलकोत्ता नाइट राइडर्सबीचको विजेतासँग फेरि क्वालिफार्स खेल खेल्नेछ।