‘दोश्रो नागिनीकपको उपाधि म्यागङ गाउपालिकास्तरीय युवा क्लबलाई

Posted on: February 02, 2020 | views: 4492

सामरी । म्यागङ गाउँपालिकाको वडा नं. ५ पोखरीडाँडामा सञ्चालन भइरहेको ‘दोश्रो नागिनीकप अन्तर–जिल्लास्तरीय खुल्ला नकआउट फुटबल प्रतियोगिता’को फाइनल म्यागङ गाउपालिकास्तरीय युवा क्लबले जितेको छ । शनिबार भएको फाइनल खेलमा आयोजक ‘बी’ समूहलाई पेनाल्टी सुट आउटमा हराउदै यस सस्करणको उपाधि म्यागङ गाउपालिकास्तरीय युवा क्लबले जितेको हो । 

फाइनलमा आयोजक ‘बी’ समूहसंग भएको प्रतिस्पर्धामा निर्धारित समयसम्म गोल हुन नसकेपछि खेलको नतिजा  पेनाल्टी मार्फत गरिएको हो । म्यागङ गाउपालिकास्तरीय युवा क्लबले आयोजक ‘बी’ समूहलाई पेनाल्टीमा ३–० गोल अन्तरले हराएको हो ।

जित सगैँ म्यागङ गाउपालिकास्तरीय युवा क्लबले नगद ८० हजार रुपैयाँ र दोश्रो भएको आयोजक बी समूहले नगद ४० हजार रुपैयाँ प्राप्त गरेको छ । बिजेता तथा उपबिजेता भएका खेलाडीलाई प्रतिनिधिसभा सदस्य एंव नेपाली काँग्रेसका केन्द्रीय सदस्य बहादुरसिंह लामा तमाङले नगद पुरस्कार सहित शिल्ड, मेडल र प्रमाणपत्र प्रदान गर्नुभएको आयोजक नागीनीथान युवा क्लबका अध्यक्ष भुवन तामाङले जानकारी दिनुभयो ।

प्रतियोगिताको अवलोकन गर्न पुग्नुभएका प्रतिनिधिसभा सदस्य बहादुुरसिह लामा तामाङ सहित म्यागङ गाउँपालिका जनप्रतिनिधिहरु लगायतका अतिथीले निकै प्रतिस्पर्धा भएको खेलले खेलाडीहरुमा क्षमता बृद्धि र उनीहरुको कलाकौशल राष्ट्रियस्तरका खेलाडीहरुमा जस्तै देखिएको भन्दै प्रशंसा गरेका थिए । ‘दोश्रो नागिनीकप अन्तर–जिल्लास्तरीय खुल्ला नकआउट फुटबल प्रतियोगिता’मा नुवाकोट र धादिङको १८ समूहले सहभागिता जनाएका थिए ।