‘तेश्रो दूप्चेश्वर कप भलिबल प्रतियोगिता’ सुरु

Posted on: January 18, 2020 | views: 619

समुन्द्रटार । ‘तेश्रो दूप्चेश्वर कप भलिबल प्रतियोगिता’ सुरु भएको छ । हिजोदेखि नै प्रतियोगिता बृहत्त कार्यक्तमको बीच उद्घाटन गरेर सुरु गरिने भएपनि वर्षाको कारण स्थागित गर्दै औपचारिक रुपमा उद्घाटन कार्यक्रम भोलि गर्न लागिएपनि खेलमा प्रतिस्पर्धा भने आजैदेखि सुरु गरिएको हो । 

आज गाउँपालिकाको उपाध्यक्ष अञ्जु आचार्यले प्रतियोगिता सञ्चालनको लागी रेफ्रीलाई बल प्रदान गरेर अनौपचारिक रुपमा सुरु भएको प्रतियोगिताको प्रतिस्पर्धामा पहिलो दिनमै पाँच खेल सम्पन्न भएको छ । 

आज भएको प्रतिस्पर्धामा आयोजक दुप्चेश्वर क्लबले पञ्चकन्या ‘बी’ समूहलाई, पञ्चकन्या गाउँपालिकाको समूहले दूप्चेश्वरको गाउँखर्कको पागर समूहलाई र सहआयोजक समेत रहेको सोसल सर्भिस युथ क्लब समुन्द्रटारले कल्याण मावि बालकुमारीलाई हराएको छ ।

यसैगरी, आजै भएको अन्य खेलमा तादी गाउँपालिकाको समूहले गाउँखर्कको पागर समूहलाई र म्यागङ गाउँपालिकाको समूहले तादी गाउँपालिकाबाट प्रतिनिधित्व गरेको योङ्ग ब्याइज समूहलाई हराएको खेल व्यबस्थापन मिलाउनुभएका शशी आचार्यले जानकारी दिनुभएको छ ।


उहाँको अनुसार खेलको औपचारिक उद्घाटन भने भोलि गर्न लागिएको छ । प्रतियोगितामा नुवाकोटको विभिन्न स्थानीयतहबाट नौ समूहले प्रतिस्पर्धाको लागी सहभागिता जनाएका छन् । 

‘नुवाकोटको अन्तर–स्थानीयतह पुरुष खुला प्रतियोगिता’को प्रतिस्पर्धामा दूप्चेश्वर गाउँपालिकाबाट चार समूह, पञ्चकन्याबाट दुई, तादीबाट दुई र म्यागङ गाउँपालिकाबाट एक समूहले सहभागिता जनाएको खेल ब्यवस्थापन गर्दै आउनुभएका वडाअध्यक्ष धुव्रकर केसीले जानकारी दिनुभएको छ । उहाँको अनुसार प्रतियोगितामा पहिलो हुने समूहलाई ८० हजार, दोश्रो हुनेलाई ५० हजार, तेश्रो हुनेलाई ३० हजार र सान्त्वना स्थान हासिल गर्ने समूहलाई १० हजार पुरस्कार सहित मेडल र प्रमाणपत्र प्रदान गर्न लागिएको छ ।