खुला राष्ट्रिय पुरुष भलिबलको उपाधि दुप्चेश्वरलाई

Posted on: March 23, 2019 | views: 6879

भ्याङ्ले । नुवाकोटको दुप्चेश्वर गाउँपालिकाको आयोजनामा सम्पन्न ‘दोश्रो दुप्चेश्वर कप खुला राष्ट्रिय पुरुष भलिबल प्रतियोगिता’को उपाधि आयोजक दुप्चेश्वर गाँउपालिकाले नै जितेको छ ।
दुप्चेश्वर गाँउपालिका–५ स्थित कल्याण माविमा आज सम्पन्न फाइनल खेलमा दुप्चेश्वरले सोसियल सर्भिस युथ क्लबलाई सोझो सेटमा पराजित गर्दै उपाधि जितेको दुप्चेश्वर गाँउपालिकाको अध्यक्ष योबिन्द्रसिंह तामाङले जानकारी दिनुभयो । 
प्रतियोगिताको फाइनलमा दुप्चेश्वरले सोसियल सर्भिसलाई २५–२२, २५–२३ र २५– १४ को सेटमा हराएको हो ।


उपाधि जितेको टोलीलाईरु एक लाख २५ हजार र दोश्रो भएको टोलीलाई रु ७५ हजार नगद सहित शिल्ड, मेडल र ट्रफि कार्यक्रमका प्रमुख अतिथी काँग्रेस जिल्ला सभापति जगदिश्वरनरसिंह केसीले प्रदान गर्नुभयो ।
प्रतियोगितामा अन्तरगत आजै भएको खेलमा पञ्चकन्या गाँउपालिकालाई हराउदै कालिका युवा क्लबले तेश्रो स्थान हासिल गरेको खेल व्यवस्थापक बिक्रम थापाले जानकारी दिनुभयो । प्रतियोगितामा उत्कृष्ट खेलाडी बिनोद चन्द घोषित हुनुभयो ।



दुई वर्ष अघिदेखि सुरु गरिएको दुप्चेश्वर कप खुला राष्ट्रिय पुरुष भलिबल प्रतियोगितालाई निरन्तर रुपमा राष्ट्रिय क्लबहरु सहभागी गराएर पुरस्कार राशी समेत बृद्धि गरी सञ्चालन गर्ने दुप्चेश्वर गाँउपालिकाको अध्यक्ष योबिन्द्रसिंह तामाङले बताउनुभयो ।