सन्दीपको छलाङ,क्यारेबियन प्रिमियर लिगको लागि नेभिसले भित्रायो

Posted on: March 02, 2018 | views: 5821

काठमाडौं  । नेपाली राष्ट्रिय क्रिकेट टोलीका युवा स्पिनर सन्दीप लामिछानेले क्यारेबियन प्रिमियर लिग (सिपिएल) टि – ट्वान्टी क्रिकेट खेल्ने भएका छन् । सन्दिपले सेन्ट किट्स नेभिस पेट्रियट्सबाट यो सिजनको सिपिएल क्रिकेट खेल्ने भएका छन् ।

सिपिएल क्रिकेटको लागि बिहिबार राति लण्डनमा सार्वजनिक गरिएको अन्तिम ड्राफ्टमा सन्दिप परेका हुन् । पहिलो पटक सिपिएल क्रिकेटको ड्राफ्टमा परेका सन्दिपलाई नेभिस पेट्रियट्सले ५ हजार अमेरिकी डलरमा क्लबमा भित्राएको हो । योसँगै सन्दिप सिपिएल खेल्ने पहिलो नेपाली खेलाडी बनेका छ । पेट्रियट्समा सन्दिपले वेष्ट इन्डिजका क्रिस गेल, कार्लोस ब्राथवेट, जिम्बाबेका ग्रेम क्रिमर जस्ता खेलाडीसँग नेट शेयर गर्ने छन् ।

वेष्ट इण्डिज क्रिकेट बोर्डले आयोजना गर्ने सिपिएल क्रिकेट आगामी ८ अगस्टदेखि सुरु हुने छ । सिपिएल क्रिकेटमा यो सिजन ६ टोलीको सहभागिता रहेको छ । यो सिजनको सिपिएल क्रिकेटको लागि २२७ जना विदेशी खेलाडी पहिलो ड्राफ्टमा रहेका थिए ।

यो बर्ष सन्दिप दोस्रो ठुला प्रतियोगिताको लागि छनोट भएका हुन् । यसअघि सन्दिप यसै सिजनको लागि इन्डियन प्रिमियर लिग (आईपिएल) मा आबद्द भएका थिए । आईपिएलको अक्सनबाट सन्दिपलाई दिल्ली डेयरभिल्सले २० लाख भारुमा किनेको थियो ।

यू – १९ क्रिकेट टोलीमा पुर्व कप्तानसमेत रहेका सन्दिप हाल आइसीसी विश्वकप छनोटको लागि नेपाली टोलीसँग जिम्बाबेमा रहेका छन् । यो बर्ष निकै उत्कृष्ट बलिङ गरिरहेका सन्दिपले नामिबियामा सम्पन्न आइसीसी विश्व क्रिकेट लिग डिभिजन टु मा सर्वा्धिक १७ विकेट लिदै म्यान अफ दि सिरिज समेत बनेका थिए ।