एसीसी यू–१९ एसिया कपको सेमिफाइनलमा नेपाल अफगानिस्तानसँग भिड्दै

Posted on: November 16, 2017 | views: 1667

काठमाडौं ।

एसीसी यू–१९ एसिया कपको सेमिफाइनलमा शुक्रबार नेपालले अफगानिस्तानको सामना गर्दैछ । 


खेलअघि प्रतिक्रिया दिँदै नेपाली प्रशिक्षक विनोद दासले नेपालले विगतको भन्दा फरक खेल प्रस्तुत गर्ने बताउनुभयो ।


पछिल्लो पटक गत जुलाईमा नेपाल र अफगानिस्तानको युवा टोली सिंगापुरमा भएको विश्वकप छनोटमा आमनेसामने भएका थिए । राउण्ड रोबिन लिगमा नेपालले अफगानिस्तान विरुद्ध खेलेका दुबै खेलमा पराजय भोगेको थियो ।


नेपालले समूह चरणमा भारत र मलेसियालाई पराजित गर्दै सेमिफाइनल यात्रा तय गरेको थियो । भारतलाई कुनैपनि स्तरको क्रिकेटमा नेपालले पहिलोचोटी पराजित गरेको हो । 


पहिलो सेमिफाइनलमा बंगलादेशलाई २ रनले पराजित गर्दै पाकिस्तान फाइनलमा प्रवेश गरेको छ । फाइनलमा उसले नेपाल र अफगानिस्तानको खेलको विजेतासँग भिड्नेछ ।