एएफसी एशियन कपमा नेपालले गुरुङको कप्तानीमा फिलिपिन्स बिरुद्ध खेल्ने

Posted on: November 13, 2017 | views: 2603

काठमाडौं । ए एफ सी एशियन कप फुटबल प्रतियोगिताका लागि नेपाली खेलाडीहरुको अन्तिम नामावली सोमबार सार्वजनिक भएको छ । २३ सदस्यीय नेपाली टोलीको कप्तानी अनिल गुरुङ्गले गर्दै छन् ।


प्रतियोगिता अन्तर्गत नेपाल र फिलिपिन्सबीचको खेल मंगलबार एन्फा मैदान सातदोबाटोमा दिनको दुई बजे शुरु हुनेछ ।


प्रतियोगिता पूर्व सोमबार आयोजित पत्रकार सम्मेलनमा नेपालका अनिल गुरुङ्गले फिलिपिन्स पहिले देखि नै नेपाल भन्दा बलियो भए पनि नेपाली टोलीमा फिलिपिन्सलाई जित्ने क्षमता रहेको बताउनुभयो ।


यसैगरी, फिलिपिन्सका कप्तान फिल योङ्गहज्बेन्डले ए एफ सी एशियन कपका लागि छनोट हुनका लागि मंगलबारको खेलले निकै महत्व राख्ने बताउनुभयो ।


नेपाल रहेको समूह एफ मा फिलिपिन्स, यमन र ताजिकिस्तान रहेका छन् । फिलिपिन्स अहिले सम्मका खेलबाट ८ अङ्क बटुल्दै शीर्ष स्थानमा रहेको छ ।


नेपाललाई पराजित गरे फिलिपिन्स पहिलो पटक ए एफ सी एशियन कपका लागि छनोट हुने छ ।


नेपाल मात्र १ अङ्क सहित समूहको पुछारमा रहेको छ भने यमन र ताजिकिस्तानको समान ६ अङ्क रहेको छ ।