नेपाल हङकङसँग ८३ रनले पराजित, विश्वकप छनौटको संभावना न्यून

Posted on: October 13, 2017 | views: 267

काठमाडौं ।

विश्व क्रिकेट लिग डब्लुसिएल च्याम्पियनसिप अन्तर्गत हङकङसँगको खेलमा नेपाल ८३ रनले पराजित भएको छ ।


हङकङले दिएको १ सय ९५ रनको लक्ष्य पछ्याएको नेपाल मात्र १ सय ११ रन बनाउँदा अलआउट हुन पुग्यो ।


आजको पराजयसँगै नेपाल विश्व क्रिकेट लिग च्याम्पियनसिपको छनौटमा पर्ने सम्भावना न्युन बनेको छ ।


हङकङको टिन कङ रिक्रिएसन मैदानमा टस हारेर पहिले ब्याटिङ गरेको हङकङले निर्धारित ५० ओभरको खेलमा सबै विकेट गुमाउँदै १९४ रन बनाएको थियो ।


नेपालका लागि बसन्त सन्दिप लामिछानेले ३ तथा करण केसी र बसन्त रेग्मीले समान २–२ विकेट लिए। सुशन भारीले १ विकेट लिए भने बाँकी खेलाडी रन आउट भए।


अब नेपालले अर्को खेल आइतबार खेल्ने छ । नेपालले समग्रमा दुई खेलमा जित वा ठूलो अन्तरको जित हात पारे तालिकाको शीर्ष चारमा पुगेर एक दिवसीय विश्वकप छनोट खेल्ने सम्भावना रहनेमा आजको पराजयपछि त्यो संभावना न्यून बनेको हो ।


आजको पराजयसँगै नेपाल डिभिजन–२ मा झर्ने सम्भावना बढेर गएको छ । यद्यपि डिभिजन–२ मा शीर्ष दुईभित्र पर्न सके एक दिवसीय विश्वकप खेल्ने विकल्प बाँकी नै रहनेछ । डब्लुसिएलको पाँचौं चरणको खेल सकिँदा नेपाल ८ अंक जोडेर छैटौं स्थामा छ। हङकङ ११ अंकसहित तालिकाको पाँचौ स्थानमा छ।