आईसीसी विश्वकप लिग खेल्न नेपाली टोली हङकङमा, एएफसी छनौटमा पराजित टोली फर्कीयो

Posted on: October 11, 2017 | views: 293

काठमाडौं । नेपाली राष्ट्रिय क्रिकेट टोली आई सी सी विश्वकप लिग क्रिकेट अन्तर्गत हङकङसँग हुने २ वटा खेलका लागि हङकङ पुगेको छ ।


आई सी सी विश्वकप लिग क्रिकेट प्रतियोगितामा नेपालले हङकङसँग यही असोज २७ र २९ गते २ वटा खेल खेल्ने छ । दुवै खेल हङकङमै हुने छन् ।


आई सी सी विश्वकप लिग क्रिकेट प्रतियोगितामा हङकङको १० खेलबाट १० अङ्क रहेको छ भने समान १० खेलबाट नेपालको ८ अङ्क रहेको छ ।


अन्तिम ४ मा पर्दै विश्वकप छनोटमा स्थान बनाउन नेपलले हङकङलाई जित्नै पर्ने हुन्छ ।


प्रतियोगिता अन्तर्गत हङकङसँगको खेलपछि नेपालले संयुक्त अरब ईमिरेट्स् यु ए ईसँग पनि २ वटा खेल खेल्ने छ ।


नेपाली फुटबल टोली स्वदेश फर्कियो

काठमाडौं । ए एफ सी एशियन कप छनोट फुटबल प्रतियोगिता अन्तर्गत ताजिकिस्तानसँगको दोश्रो खेलपछि नेपाली राष्ट्रिय फुटबल टोली आज काठमाडौं फर्किएको छ ।


ताजिकिस्तानको दुसान्वेमा मंगलबार राति भएको खेलमा नेपाल ३–० गोल अन्तरले पराजित भएको थियो ।


नेपालले सबै ३ गोल पेनाल्टी मार्फत खाएको थियो ।


यो पराजयसँगै नेपालको ए एफ सी एशियन कपमा छनोट हुने झिनो आशा पनि समाप्त भएको छ ।


ताजिकिस्तानसँग गत महिना काठमाडौंमा भएको पहिलो खेलमा पनि नेपाल पराजित भएको थियो ।


नेपाल पहिलो खेलमा फिलिपिन्ससँग पराजित भएको थियो भने यमनसँगको खेल गोल रहित बराबरीमा सम्पन्न भएको थियो ।


समूह एफ नेपाल सहित फिलिपिन्स, यमन र ताजिकिस्तान रहेका छन् ।


नेपाल १ अङ्क सहित समूहको पुछारमा रहेको छ ।


नेपालको यसपछि फिलिपिन्स र यमनसँग हुने खेल अब फिफा वरियताका लागि मात्र सिमित हुनेछ ।