एएफसी अध्यक्ष सलमान ३ दिने नेपाल भ्रमणमा आउँदै

Posted on: October 06, 2017 | views: 365

काठमाडौं । एशियाली फुटबल महासंघ एएफसीका अध्यक्ष शेख सलमान ३ दिने भ्रमणका लागि नेपाल आउने पक्का भएको छ ।


एएफसीका सदस्य राष्ट्रको नियमित भ्रमणका क्रममा सलमान नेपाल आउन लागेको अखिल नेपाल फुटबल संघ एन्फाका कार्यकारी अधिकृत इन्द्रमान तुलाधरले जानकारी दिनुभयो । 


३ दिने नेपाल बसाइमा सलमानले एन्फाका पदाधिकारी तथा नेपाली फुटबलका सरोकारवाला निकायसँग छलफल गर्ने कार्यक्रम रहेको तुलाधरले बताउनुभयो । 


डेढ वर्षअघि सम्पन्न विश्व फुटबल महासंघ अध्यक्षको उम्मेदवारको रुपमा रहेका सलमानको पक्षमा नेपालले मतदान गरेको थियो । तर सलमान स्वीस नागरिक जियान्नी इन्फान्टिन्होसँग पराजित हुनुुभएको थियो । 


एएफसीको अध्यक्ष निर्वाचित भएपछि सलमानले भ्रमण गर्न बाँकी सदस्य मुलुकहरु नेपाल र भुटानमात्र हो ।


भारतमा शुक्रबार बाट शुरु भएको यू १७ विश्वकप फुटबलका लागि आउने क्रममा सलमानले २ छिमेकी मुलुकको भ्रमणको योजना बनाएको बताइएको छ ।