भारतलाई हराएर उपाधि जितेको यु १८ फुटवल टोलि स्वदेश फर्कियो (भिडियो सहित)

Posted on: September 29, 2017 | views: 2879

काठमाडौं ।

भुटानमा सम्पन्न १८ वर्ष मुनि उमेर समूहको साफ फुटबल प्रतियोगितामा विजयी नेपाली राष्ट्रिय फुटबल टोली बिहीबार काठमाडौँ फर्किएको छ ।


राजधानी थिम्पुस्थित चाङ्गग्लिमिनथाङ्ग रङ्गशालामा बुधबार राति भएको प्रतियोगिताको अन्तिम खेलमा नेपालले भारतलाई २–० गोल अन्तरले पराजित गरेको थियो ।


बंगलादेश सरह नेपालको समान ९ अङ्क भएता पनि हेड टु हेडका आधारमा पूर्व विजेता नेपाल प्रतियोगितामा प्रथम हुन सफल भएको थियो ।


हेड टु हेड कै आधारमा बंगलादेश दोश्रो भएको थियो ।


भारत बिरुद्धको अन्तिम खेलमा नेपालका लागि दुवै गोल गर्ने दिनेश हेन्जन प्रतियोगिताको सर्वोत्कृष्ट खेलाडी घोषित भएका थिए ।


यसैगरी आयोजक भुटानले फेएर प्लेको उपाधि प्राप्त गरेको थियो ।


प्रतियोगितामा नेपाल सहित आयोजक भुटान, माल्दिभ्स्, भारत र बंगलादेशको सहभागिता रहेको थियो ।


श्रीलङ्काले अन्तिम समयमा आएर प्रतियोगितामा सहभागी नहुने जनाएपछि २ समूहमा विभाजन गरी बनाईएको लिग तालिका परिवर्तन गर्दै सिङ्गल राउण्ड रोबिनका आधारमा खेल तालिका बनाईएको थियो ।


सिङ्गल राउण्ड रोबिनमा सहभागी प्रत्येक राष्ट्रले एक अर्कासँग एक पटक खेल्नु पर्ने हुन्छ ।


पहिलो खेलमै भुटानसँग पराजित भएकाले पूर्व विजेता नेपाललाई प्रतियोगितामा फर्कन निकै गार्हो भएको थियो ।


तर, नेपालले त्यसपछि माल्दिभ्स्, बंगलादेश र अन्तिममा भारतलाई पराजित गरेपछि उपाधि जोगाउन सफल भएको थियो ।


२ वर्षअघि काठमाडौंमै भएको यस प्रतियोगितामा पनि नेपालले प्रथम स्थान प्राप्त गरेको थियो ।


भुटानबाट बिहीबार काठमाडौँ फर्किएको नेपाली टोलीलाई त्रिभुवन अन्तिराष्ट्रिय विमान स्थलमा अखिल नेपाल फुटबल संघ एन्फाका पदाधिकारी तथा उपस्थित सर्वसाधारण लगायतले स्वागत गरेका थिए ।