अर्बौं भ्रष्टाचारका नाईके शर्माको मुद्दा यथास्थितिमा राख्न सर्वोच्चको आदेश

Posted on: July 19, 2017 | views: 295

काठमाडौं ।

सर्वोच्च अदालतले आन्तरिक राजश्व विभागका निलम्बित महानिर्देशक चूडामणि शर्माविरुद्धको विशेष अदालतमा दायर भ्रष्टाचार मुद्दालाई यथास्थितिमा राख्न आदेश दिएको छ । 


न्यायाधीश चोलेन्द्रशमशेर जवरा र प्रकाश राउतको संयुक्त इजलासले आज शर्माको विशेष अदालतको मुद्दालाई यथास्थितिमा राखी पूर्ण इजलासमा पठाउन आदेश दिएको सर्वोच्च अदालतमा प्रवक्ता महेन्द्रनाथ उपाध्यायले जानकारी दिनुभयो । 

प्रवक्ता उपाध्यायले शर्माको मुद्दामा गम्भीर कानुनी जटिलता देखापरेको हुनाले त्यस मुद्दालाई पूर्ण इजलासमा पठाउने आदेश दिएको बताउनुभयो । 


शर्माका श्रीमती कल्पना उप्रेतीले विशेष अदालतलाई विपक्षी बनाइ गत असार २७ गते गैरकानुनी रूपमा थुनामा राखेको भन्दै रिहाइको माग गरी बन्दी प्रत्यक्षीकरणको रिट दायर गर्नुभएको थियो । 


शर्मालाई विशेष अदालतले पुर्पक्षका लागि थुनामा राखेर अनुसन्धान गर्न आदेश दिएपछि अहिले उनलाई थुनामा राखिएको छ । 


शर्माविरुद्ध एनसेलको स्वामित्व विक्री हुँदा पुँजीगत लाभकर नउठाइ एनसेललाई उन्मुक्ति दिएको, कर फछ्र्यौट आयोगको सदस्य–सचिवसमेत रहनुभएका शर्मामाथि रु २१ अर्ब बराबरको रकम कर मिनाहा गर्न भूमिका खेलेकोलगायत आरोप लागेको छ ।

यस बारेमा शर्मा सहितको कर फर्छ्यौट आयोगले अर्बौंको कर व्यापारिहरुमा मिनाहा गरेर बदनीयत गरेको खुलाशा भइसकेको छ ।