राष्ट्रपति भारत भ्रमण सकेर स्वदेश फिर्ता

Posted on: April 21, 2017 | views: 155

बैशाख ।

राष्ट्रपति विद्यादेवी भण्डारी भारतको पाँचदिने राजकीय भ्रमण पूरा गरी आज स्वदेश फर्कनु भएको छ । 

भारतीय राष्ट्रपति प्रणव मुखर्जीको औपचारिक निमन्त्रणामा गत सोमबार राजकीय भ्रमणका लागि नयाँ दिल्ली जानुभएकी राष्ट्रपति भण्डारी केहिबेर अघि काठमाडौं आइपुग्नु भएको हो । 

राष्ट्रपति भण्डारी स्वदेश फर्कनु हँुदा त्रिभुवन अन्तर्राष्ट्रिय विमानस्थलमा उहाँलाई उपराष्ट्रपति नन्दबहादुर पुनले स्वागत गर्नुभयो ।

यसैगरी प्रधानमन्त्री पुष्पकमल दाहाल प्रचण्ड, उपप्रधानमन्त्रीहरु, मन्त्रीहरु, सुरक्षा निकायका प्रमुखहरु तथा उच्च पदस्थ अधिकारीहरु राष्ट्रपतिको स्वागतका लागि त्रिभुवन अन्तराष्ट्रिय विमानस्थलमा उपस्थित हुनुहुन्थ्यो ।

भारत भ्रमणका क्रममा राष्ट्रपति विभिन्न उच्चस्तरीय भेटघाटमा व्यस्त रहनुभयो । भ्रमणका क्रममा नयाँदिल्लीमा राष्ट्रपति भण्डारी र भारतीय राष्ट्रपति मुखर्जीबीच भेटवार्ता भएको थियो । 

त्यसैगरी राष्ट्रपति भण्डारीसँग भारतीय उपराष्ट्रपति हमिद अन्सारी, प्रधानमन्त्री नरेन्द्र मोदी, भारतीय विदेशमन्त्री सुस्मा स्वराज, गृहमन्त्री राजनाथ सिंह, अर्थमन्त्री अरुण जेट्लीलगायतले शिष्टाचार भेट गर्नुभयो ।

राष्ट्रपति भण्डारीले भारतको गुजरात र उडिसा राज्यको भ्रमण गर्नुभएको थियो । 

राष्ट्रपति भण्डारीले आज बिहान उडिसाको पुरीस्थित जगन्नाथ मन्दिर पुगेर दर्शन र पूजाआजा गर्नुभएको थियो ।

त्यहाँ भारतीय सञ्चारमाध्यमहरुसँग कुरा गर्नुहुँदै राष्ट्रपति भण्डारीले आफ्नो भ्रमणले दुई देश र जनताबीचको मैत्रिपूर्ण सम्बन्धलाई अझै प्रगाढ बनाउने विश्वास व्यक्त गर्नुभयो ।