राष्ट्रपति भण्डारी भारतमा भेटघाटमा व्यस्त

Posted on: April 18, 2017 | views: 350

काठमाडौं ।

मित्रराष्ट्र भारतको पाँचदिने राजकीय भ्रमणका क्रममा राष्ट्रपति विद्यादेवी भण्डारी आज दिनभर नयाँदिल्लीमा महत्वपूर्ण भेटघाटमा व्यस्त रहनु भयो । 


राष्ट्रपति भण्डारीसँग भारतीय प्रधानमन्त्री नरेन्द्र मोदीले भारतीय भवनमा आज शिष्टाचार भेट गर्नुभयो । 


राष्ट्रपति भण्डारीसँग आजै भारतका विदेशमन्त्री सुष्मा स्वराज, गृहमन्त्री राजनाथ सिंह र वित्तमन्त्री अरुण जेट्लीले अलग अलग भेट गर्नुभयो । 


भेटका अवसरमा राष्ट्रपति भण्डारीले नेपाल भारतबीच साँस्कृतिक, धार्मिक तथा सामाजिक सम्बन्ध रहेको बताउँदै आफ्नो भ्रमणले दुइ देशबीचको मित्रता अझै प्रगाढ हुने विश्वास व्यक्त गर्नुभयो । 


आजै राष्ट्रपति भण्डारीलाई भारतीय सेनाले राजकीय सम्मानस्वरुप राष्ट्रपति कार्यालय परिसरमा गार्ड अफ अनर प्रदान गरेको थियो । 


त्यस अवसरमा राष्ट्रपति भण्डारीका समकक्षी प्रणव मुखर्जी, प्रधानमन्त्री नरेन्द्र मोदीलगायत भारतीय उच्च अधिकारीको सहभागिता थियो । 


त्यसलगत्तै राष्ट्रपति भण्डारी राजघाट पुगेर त्यहाँस्थित महात्मा गान्धीको समाधिमा पुष्पमाला अर्पण गरेर श्रद्धाञ्जलि अर्पण गर्नुभएको थियो । 


उहाँले आजै बजिरावादस्थित यमुना जैविक विविधता संरक्षण उद्यानको अवलोकन गर्दै राष्ट्रपतिले महुवाको बिरुवासमेत रोप्नु भएको थियो । 


आजै राष्ट्रपति भण्डारी र भारतीय राष्ट्रपति प्रणव मुखर्जीबीच भेटवार्ता हुने कार्यक्रम छ ।