नेपालमै मात्र बिदा । नेपाल र भारतको राष्ट्रपति आउँदा जाँदा नेपालमै मात्र बिदा

Posted on: April 16, 2017 | views: 477

काठमाडौं ।

भारतीय राष्ट्रपति नेपाल आउने भएकै कारण नेपालमा सार्वजनिक बिदा दिएको पुष्पकमल दाहाल सरकारले राष्ट्रपति विद्या भण्डारी भारत जाँदा समेत सोमबार सार्वजनिक बिदा दिने निर्णय गरेको छ ।


रोचक कुरा के भने भारतले न त उसका राष्ट्रपति नेपाल आउँदा भारतमा बिदा दिएको छ न त हाम्रो राष्ट्रपति भारत जाने दिननै कुनै बिदा दिएको छ ।

भारतप्रति नरम र भक्तिभाव देखाउने गरि नेपालमै मात्र बिदा दिर्ने निर्णय भएपछि यसको सामाजिक सञ्जालमा फेरी बिरोध सुरु भएको छ ।

आइतबार बसेको मन्त्रिपरिषद बैठकले सोमबार एकदिन विदा दिने निर्णय गरेको हो ।

राष्ट्रपति विद्यादेवी भण्डारी सोमबार भारतको औपचारिक भ्रमणमा जाँदैछिन् । भण्डारी राष्ट्रपति भएपछि यो पहिलो विदेश भ्रमण हो ।

आइतबार बसेको मन्त्रिपरिषद बैठकले उनको भारत भ्रमणको तालिका स्वीकृत पनि गरेको छ ।


राष्ट्रपति भण्डारीले भारत बसाईको क्रममा समकक्षी प्रणव मुखर्जी, उपराष्ट्रपति हमिद अन्सारी र प्रधानमन्त्री नरेन्द्र मोदी लगायतसँग शिष्टाचार भेट गर्नेछिन् । राष्ट्रपति भण्डारी भारतमा हुने विभिन्न स्वागत समारोहमा सहभागी हुनेछिन् । उनले गुजरात र उडिसा राज्यको पनि भ्रमण गर्ने कार्यक्रम छ ।


यसअघि राष्ट्रपति भण्डारीको औपचारिक निमन्त्रणामा भारतका राष्ट्रपति मुखर्जीले गत कात्तिक २७ देखि २९ गतेसम्म नेपालको भ्रमण गरेका थिए ।


मुखर्जीको नेपाल भ्रमणमा प्रधानमन्त्री पुष्पकमल दाहाल सरकारले मन्त्रीपरिषद बैठक डाकेर उनि आउने र जाने दिन सार्वजनिक बिदा दिएको थियो । यसको चर्को बिरोध भएपनि सरकारले लाज ढाक्नको लागि त्यसलाई सच्याएर भारत र चीनका राष्ट्रपति आउँदा अब जहिले पनि बिदा दिने भनि निर्णय तोडमोड गर्दै बिरोध छल्न खोजेको थियो ।