बुद्धकृष्णले जिब्रो छेड्दै

Posted on: April 15, 2017 | views: 188

भक्तपुर ।

बिस्केट जात्रा अन्तर्गत मनाइने बोडेको प्रसिद्ध जिब्रो छेड्ने जात्रा आज मनाईंदै छ ।चैत मसान्तको दिन बोडे महालक्ष्मी मन्दिर प्राङ्गणमा लिङ्गो उठाएपछि निराहार व्रत बसेका मध्यपुरथिमि नगरपालिका ८ बोडेका ४५ वर्षका बुद्धकृष्ण वागश्रेष्ठले आज दिउसो सयौँ मानिसका अगाडि जिब्रो छेड्दै छन् ।


आज बिहानै जिब्रो छेड्ने कर्मी र नाइकेहरूले विभिन्न देवगणको पूजा गरी जिब्रो छेड्ने जात्रा गर्न दिउँसो बोडेको पाँचो गणेशको दक्षिण फर्केको पाटीमा मञ्च बनाइ नायखि बाजागाजाका साथ जिब्रो छेड्ने ब्यक्तिलाई मञ्चमा राखिन्छ ।नकर्मीले एक महिनाअघि बनाएर तेलमा डुबाइराखेको  करिब १० इन्च लामो सुइरोले देवगणको पूजा एवम् प्रार्थना गरी सयाँै मानिसको अगाडि जिब्रो छेडिन्छ ।


जिब्रो छेडेपछि चन्द्राकारको मसालजस्तो बनाइएको भ्वाय् अर्थात् महाद्वीप बोकेर टोलटोल घुमेर जिब्रो छेड्ने ब्यक्तिले  पुनः भाँगु टोलमा पुगेर पाँचो गणेश मन्दिरमा जिब्रो छेडेको सुइरो निकालेर महालक्ष्मी मन्दिरको दायाँबायाँ ठोकिन्छ ।


जिब्रोको घाउमा महालक्ष्मी मन्दिरको माटो झिकेर लाएर जिब्रो छेड्ने व्यक्तिले नाट्येश्वरको पूजा गर्ने प्रचलन रहेको छ । 


विगत आठवर्षदेखि जिब्रो छेड्दै आएका ३९ वर्षका जुजुभाई बाँसश्रेष्ठले पारिवारीक समस्याका  कारण यसवर्ष  जिब्रो नछेड्ने भएपछि जात्रालाई निरन्तरता दिन बुद्घकृष्णले  जिब्रो छेड्ने घोषणा गर्नुभएको थियो । 


बुद्धकृष्णले यसअघि २०६२ सालदेखि २०६५ सालसम्म चारवर्ष निरन्तर जिब्रो छेड्नु भएको थियो । 


                  सिन्दुर जात्रा मनाईंदै


यस अघि मध्यपुरथिमी क्षेत्रका वासिन्दाले अहिले  हर्षोल्लासका साथ ३२ खट सहितको सिन्दुरजात्रा अर्थात सुथ ः सिया जात्रा मनाई रहेका छन् । बालकुमारीलाई बिभिन्न क्षेत्रको परिक्रमा गराई भव्य एवं उमङ्ग र उत्साहका साथ थिमिका वासिन्दाले सिन्दुर खेल्दै यो जात्रा मनाउछन् ।


सिन्दुर जात्रा अन्तर्गत आज विहानै बालकुमारी र कालिका अर्थात बालाखुको खट बालकुमारी मन्दिरबाट बाहिर निकालिएको छ । विहानै सिद्धिकालीको खट ल्याएर आफ्ना गणहरु सहित बालकुमारी प्रवेश गराएपछि यो जात्रा सुरु भएको थियो ।