पाकिस्तानी कर्णेल बेपत्ता प्रकरणमा भारतीय संलग्नताको आशंका

Posted on: April 14, 2017 | views: 485

काठमाडौं ।

नेपालको लुम्बिनी क्षेत्रबाट रहस्यमय रुपमा हराईरहेका पूर्व पाकिस्तानी सैनिक अधिकारीमा भारतीय संलग्नताको आशंका गरिएको छ ।


पाकिस्तानी सेनावाट अवकाशप्राप्त लेफ्टिनेन्ट कर्णेल मोहम्मद हबिब जाहिर बेपत्ता हुनुमा पाकिस्तानको अवैध गुप्तचरी गर्ने भारतीय कुलभुषण यादवलाई पाकिस्तानमा मृत्युदण्ड दिएको घटनासँग सम्वन्धित रहेको देखिएको पाकिस्तानी समाचार संस्थाहरुले उल्लेख गरेका छन् ।


भारतीय मिडियाहरुले समेत पाकिस्तानी कर्णेल जाहिर बेपत्ता र यादवको मृत्युदण्ड सजाए एकै समयमा हुनु, भारतीय सिमा नजिकबाट रहस्यमय ढंगबाट जाहिरलाई बेपत्ता बनाउनु तथा उनलाई नेपाल बोलाउन प्रयोग गरिएका वेवसाइट र सम्पर्क आदि भारतमा दर्ता गरिनु आदि कारण घटनामा भारतीय संलग्नता देखिएको उल्लेख गरेका छन् ।


भैरहवास्थित गौतम बुद्ध विमानस्थलवाट बाहिरिएपछि हालसम्म कुनै संकेत फेला नपरेको नेपाली अधिकारीहरुले बताइरहँदा पाँचदिन अघि बेपत्ता हबिब जाहिर रोजगारीका लागि अन्तर्वार्ता दिन ओमान भएर काठमाण्डु आएलगत्तै भैरहवा विमानस्थालमा पुगेर बेपत्ता हुनु रहस्यमय भनेका छन् ।


प्रहरी अनुसन्धान अनुसार उनी बुद्धएअरको विमान चढेर काठमाडौंबाट गौतमबुद्ध विमानस्थल उत्रेपछि अचानक सम्पर्कविहीन भएका थिए ।


नेपाल प्रहरीको विशेष ब्युरोको सहयोगमा जिल्ला, अञ्चल र क्षेत्रीय प्रहरी कार्यालयले उनको फोटो र सीसीटीभी फुटेजका आधारमा अनुसन्धान गरिरहेको अञ्चल प्रहरी कार्यालयले जनाएको छ ।


प्रहरीलाई प्राप्त भएको सीसीटीभी फुटेजमा हराएको भनिएका हबिब जाहिर एउटा पछाडी भिर्ने झोला र अर्को हाते झोलावोकेर विमानस्थल बाहिरसम्म हिंडेर आएको देखिने प्रहरीको भनाइ छ ।


सिसिटिभिमा देखिए अनुसार ती हराएका व्यक्ति विमानस्थल बाहिर आएलगत्तै एकजना परिचित जस्तै देखिने अर्का व्यक्ति उनलाई लिन एक ब्यक्ति आएको जस्तो देखिन्छ ।


उनलाई लिन आएको हुनसक्ने ब्यक्ति र विमानस्थलवाट बाहिरिनकालागि प्रयोग गरिएको सवारिसाधन पहिचानकालागि पनि अनुसन्धान अधिकारीहरु खटिएको प्रहरीको भनाइ छ ।


यद्यपी यसमा नेपाल प्रहरीले कुनैपनि तथ्य पत्ता लगाउन सकेको छैन भने भैरहवा, लुम्बिनी, कपिलवस्तु, नवलपरासीस्थित होटलहरुमा निजको नाममा कुनैपनि कोठा बुक नभएको पाइएपछि उनको अपहरण नै भएको र यो योजनाबद्ध रुपमा भएको देखिएको सुरक्षाअधिकारीहरुले बताएका छन् ।


नेपालको परराष्ट्र मन्त्रालयमार्फत पाकिस्तान सरकारको औपचारिक अनुरोध प्राप्त गरेलगत्तै खोजी कार्यलाई तीव्रता दिईएपनि हालसम्म कुनै संकेत फेला नपरेको गृहमन्त्रालयका प्रवक्ता बालकृष्ण पन्थीले बताएका छन् ।


पाकिस्तानी पूर्व कर्णेल लुम्बिनीबाट बेपत्ता, भारतीय संलग्नताको आशंका