बिस्केट जात्रा अन्तर्गत आज लिङ्गो ढालिंदै

Posted on: April 14, 2017 | views: 233
भक्तपुर ।
नववर्षको आगमनसँगै सुरु हुने भक्तपुरको प्रसिद्ध सांस्कृतिक एवम् ऐतिहासिक महत्व बोकेको बिस्केट जात्राको पाँचौ दिन आज ५५ हात लामो लिङ्गो  ढालिंदैछ । 

नयाँ वर्ष वैशाख १ गतेका दिन आज दिनभर जात्रा गरी साँझ लिङ्गो ढालिन्छ ।

हिजो साँझ लिङ्गो उठाउने क्रममा पहिलो लिङ्गो भाँच्चिएर एकजनाको ज्यान गएको थियो भने पाँचजना घाइते भएपछि स्थानीयवासीले राति १० बजे अर्को लिङ्गो उठाएका थिए । 

स्थानीयका अनुसार लिङ्गो भाँचिनुलाई अपसगुन र अनिष्टको सङ्केतको रुपमा लिने गरिएको छ ।

नाग र नागिनीको प्रतीकको रूपमा लिइने लिङ्गो ढाल्न साँझ हजारौँ स्थानीयवासी सहभागी हुने गर्दछन् । 

तान्त्रिक विधिअनुरूप पूजाअर्चना गरी साँझ लिङ्गो ढालिन्छ । लिङ्गको कोखामा नाग र नागिनीको प्रतीकस्वरूप दुइटा ध्वजा बाँधेर अष्टमातृकाका प्रतीक आठ डोरीले तानी आठ कुनामा बसेर लिङ्गो ढालिन्छ । 

लिङ्गाको कोखामा झुन्ड्याइएका दुई ध्वजालाई वीरध्वजा, विश्वध्वजा  र आकाशभैरवका ध्वजासमेत भनिन्छ । 

लिङ्गो जात्रा हेर्नाले सुख, समृद्घि,सहकाल आउनाका साथै शत्रु नाश हुन्छन् भन्ने धार्मिक मान्यता रहेकाले जात्रालाई शत्रुहन्ता जात्रा पनि भन्ने गरिएको इतिहास तथा संस्कृतिविद् बताउँछन् । 

लिङ्गो ढाले लगतै खँला टोलमा भैरवनाथ र भद्रकालीको रथलाई एकआपसमा जुधाइने परम्परा रहेको छ ।
साँझपख दुमाजु देवीको जात्रासमेत गरिन्छ ।