नेपाली सेना र चिनियाँ जनमुक्ति सेनाबीच ३ गतेबाट सैन्य अध्यास

Posted on: April 13, 2017 | views: 376

काठमाडौं ।

नेपाली सेना र चीनको जनमुक्ति सेनाबीच पहिलो पटक आगामी वैशाख ३ देखि १२ गतेसम्म काठमाडौँमा संयुक्त सैन्य अभ्यास हुने भएको छ । 


विश्वको गम्भीर सुरक्षा चुनौतीका रुपमा देखापरेको आतङ्कवादबाट भविष्यमा आउन सक्ने सम्भावित सुरक्षा चुनौतीलाई ध्यानमा राखी सगरमाथा फ्रेन्डसिप– १७ नाम दिएर दुई देशका सेनाबीच सो तालिम सञ्चालन गरिने नेपाली सेनाले जनाएको छ । 


छिमेकी तथा अन्य मित्र राष्ट्रको सेनासँग सञ्चालन हुँदै आएका संयुक्त तालिम तथा अभ्यासलाई निरन्तरता दिने क्रममा पहिलो पटक चीनको जनमुक्ति सेनासँग दशदिने तालिम हुने सैनिक जनसम्पर्क निर्देशनालयले आज जनाएको छ । 


तालिमका क्रममा विपद् व्यवस्थापनलगायत साझा हित र सरोकारका विषयमा पनि छलफल हुने पनि सैनिक जनसम्पर्क निर्देशनालयले जनाएको छ ।