म्यादी प्रहरीलाई निर्वाचन सफल पार्न प्रमुख निर्वाचन आयक्तको आग्रह

Posted on: April 12, 2017 | views: 270

सिन्धुली ।

निर्वाचन आयोगका प्रमुख निर्वाचन आयुक्त डा.अयोधिप्रसाद यादवले स्वच्छ, निष्पक्ष र भयरहित तरिकाले निर्वाचन सफल पार्न म्यादी प्रहरीलाई आग्रह गर्नुभएको छ ।


सिन्धुलीमाढीमा आज आयोजित कार्यक्रममा प्रमुख आयुक्त डा. यादवले निर्वाचन सम्पन्न गर्न म्यादी प्रहरीको भूमिका पनि महत्वपूर्ण हुने बताउनुभयो । 


निर्वाचन व्यवस्थापनसम्बन्धी क्षेत्रीय गोष्ठी विराटनगरमा सुरु

विराटनगर, ३० चैत्र । स्थानीय तहको निर्वाचनलाई लक्षित गर्दै निर्वाचन व्यवस्थापन तथा सञ्चालनसम्बन्धी क्षेत्रीय गोष्ठी आज विराटनगरमा सुरु भएको. छ ।


निर्वाचन कार्यालयको आयोजनामा भएको  गोष्ठीमा मोरङ, सुनसरी, धनकुटा, भोजपुर तथा सप्तरी जिल्लाका मुख्य निर्वाचन अधिकृत तथा निर्वाचन अधिकृतहरुको सहभागिता रहेको छ । 


गोष्टीको उद्घाटन गर्नुहुदै निर्वाचन आयुक्त नरेन्द्र दाहालले हिमाल, पहाड, तराइ, मधेश सबैतिर एकै चरणमा निर्वाचन गर्ने गरी आयोगले आफनो काम अगाडी बढाएको  बताउनुभयो ।


कार्यक्रममा उच्चस्तरीय प्रसासन सुधार अनुगमन आयोगका अध्यक्ष काशीराज दाहाल, उच्च अदालत विराटनगरका कायम मुकायम मुख्य न्यायधीश विदुरविक्रम थापा लगायतले गोष्ठीको महत्वमाथि प्रकाश पार्नु भएको थियो । 


मतदाता शिक्षासम्बन्धी अभियान २४ जिल्लामा हुने

काठमाडौं, ३० चैत्र । आगामी स्थानीय तह निर्वाचनमा महिला, दलित र अल्पसंख्यक समुदायको अर्थपूर्ण सहभागिताका लागि ‘महिला, दलित र अल्पसंख्यक अभियान’ विभिन्न २४ जिल्लामा सुरु हुने भएको छ । 


संयुक्त राष्ट्रसंघीय विकास कार्यक्रमअन्तर्गतको निर्वाचन सहयोग परियोजनाले आगामी बैशाख १ गतेदेखि अभियान सञ्चालन गर्ने छ ।


प्रशिक्षणको आज काठमाडौंमा उद्घाटन गर्दै निर्वाचन आयोगका सहसचिव दीपक सुवेदीले स्थानीय तहमा महिलाको सहभागिताका लागि नीतिगत र संरचनागत व्यवस्था गरिएको बताउनुभयो । 


सिराहा, उदयपुर, बाँके, रोल्पा, रुकुम, प्यूठान, कपिलवस्तु, दाङ, जुम्ला, दैलेख, कालिकोट, तेह्रथुम, झापा, मोरङ, सुनसरी, डडेल्धुरा, बर्दिया, कैलाली, बैतडी, सर्लाही, महोत्तरी, नवलपरासी, पर्वत, र बाग्लुङ जिल्लामा अभियान सञ्चालन हुने छ । 


महोत्तरीमा दुई सय ५६ मतदान केन्द्र तोकियो

महोत्तरी, ३० चैत्र । आसन्न स्थानीय तहको निर्वाचनका लागि महोत्तरी जिल्लामा दुई सय ५६ मतदान केन्द्र तोकिएको छ ।


बर्दिबास, गौशाला, जलेश्वर गरी तीन नगरपालिका र १२ गाउँपालिका रहेको महोत्तरीमा यसअघि दुई सय ३३ मतदान केन्द्र रहेकामा प्रमुख जिल्ला अधिकारी वीरेन्द्र यादवको अध्यक्षतामा बसेको बैठकले २५ मतदान केन्द्र थप, पाँच संशोधन र दुईवटा खारेज गरिएको जिल्ला निर्वाचन अधिकारी पिङ्की रायले बताउनुभयो । 


महोत्तरीमा स्थानीय तह निर्वाचनका लागि यसपालि तीन लाख आठ हजार चार सय दुई मतदाता रहेका छन् ।