राष्ट्रपति भण्डारी मेला उद्घाटन देखी चिनियाँ राजदूत भेटघाटसम्म

Posted on: April 07, 2017 | views: 309

काठमाडौं ।

राष्ट्रपति विद्यादेवी भण्डारीले ‘छैटौँ घरजग्गा मेला–२०७३’ आज काठमाडौंमा उद्घाटन गर्नु भएको छ  । मेलाको उदघाटन गर्नुहुँदै राष्ट्रपति भण्डारीले कानुन र भवन आचारसंहिताको प्रभावकारी पालना गर्नुपर्ने बताउनु भयो ।


राष्ट्रपति भण्डारीले घर जग्गा तथा आवासहरुको निर्माण गर्दा स्थानीय कच्चा पदार्थ तथा प्रविधिको प्रयोगलाई उच्चतम प्रयोगमा ल्याउन व्यवसायीहरुले ध्यान दिनुपर्नेमा जोड दिनुभयो । 

उहाँले नेपाल भुकम्पीय दृष्टिले उच्च जोखिममा रहेकाले निर्माण कार्य अघि बढाउदा यहाँको मौसम, भूगोल र हावापानीलाई ख्याल गर्र्नु आवश्यक रहेको बताउनुभयो । 


कार्यक्रममा नेकपा एमालेका अध्यक्ष केपी शर्मा ओलीले घर जग्गा कारोबार गर्दा व्यवसायिक लाभ मात्र नहेरी देश र समाजको हितमा ध्यान पु¥याउनुपर्ने बताउनु भयो । 


व्यवसायिक आवासहरुको निर्माण गर्दा बलिया, भुकम्प प्रतिरोधीे निर्माण गर्नुपर्ने र मध्यपहाडी लोकमार्ग तथा तराईमा हुलाकी मार्गको छेउछाउमा नयाँ बस्ती तथा शहरको विकास गर्दा खेती नहुने स्थानलाई छनौट गर्नु पर्नेमा पनि पूर्वप्रधानमन्त्री ओलीले जोड दिनु भयो ।


कार्यक्रममा उद्योगमन्त्री नविन्द्रराज जोशीले औद्योगिक विकास र आन्तरिक उत्पादनका वस्तुहरुको खपतमा घरजग्गा विकासकर्ताहरुले ध्यान दिन पर्ने बताउनु भयो । 


कार्यक्रममा नेपाल घरजग्गा तथा आवास विकास संघका अध्यक्ष सांसद इच्छाराज तामाङले घर जग्गा व्यवसायमा २ खर्ब भन्दा बढी लगानी भएकाले यसलाई व्यवस्थित गर्नुपर्ने बताउनुभयो । 


मेलामा सुरक्षित एवम् भूकम्प प्रतिरोधी आवास तथा त्यस सम्बन्धी सामग्रीहरुका विभिन्न १ सय २०  प्रदर्शनी कक्ष राखिएका छन् । मेला चारदिनसम्म चल्ने छ । 


राष्ट्रपति भण्डारीसँग चिनीया राजदूतको शिष्टाचार भेट

काठमाडौँ, २५ चैत्र । राष्ट्रपति विद्यादेवी भण्डारीसँग नेपालका लागि चीनका राजदूत यु होङले आज शिष्टाचार भेट गर्नुभयो । 


राष्ट्रपति भवन, शीतलनिवासमा उहाँहरूबीच भएको भेटवार्तामा दुई देशको सम्बन्ध अझ प्रगाढ बनाउने विषयमा छलफल भएको राष्ट्रपति कार्यालयद्वारा जारी विज्ञप्तीमा उल्लेख छ ।