जाजरकोटमा काँग्रेस नेताको हत्या

Posted on: March 29, 2017 | views: 266

जाजरकोट ।
भेरी नगरपालिका ३, थाप्ले निवासी काँग्रेस नेता ३६ बर्षीय रविन्द्र शम्शेर शाहको हत्या भएको छ ।

मंगलवार साँझ जिल्ला अस्पताल नजिकै जाजरकोट– डोल्पा सडकमा ७÷८ जनाको अपरिचत समुहले ढुंगाले हानेर हत्या गरेका हुन् ।

शाह जाजरकोट – डोल्पा सडकको खलंगा रिम्ना खण्डमा इभीनिङ्ग वाक गरीरहेको मौका छोपी अपरिचित ब्यक्तिहरुले घेरा हालेर अचानक ढुंगा प्रहार गरेको सहयोगी हिटलर सिंह राठौरले बताए ।

उनी सँगै रहेका राठौरले भागेर ज्यान जोगाउन सफल भएका छन् । नेविसंघका पुर्व केन्द्रिय सदस्य तथा पाँचतारा युवा संरक्षक मञ्चका अध्यक्ष रहेका शाह जिल्लाकै अग्र पंक्तिका समाजसेवी हुन् । उनी अविवाहित थिए ।

हत्याराले शाहको टाउको तथा अनुहारमा ढुंगाले कुच्याई सडकमै हत्या गरे पश्चात शव ५ सय मीटर तल भीरमा फालेका थिए ।

प्रहरीलाई भीरबाट मृतकको शव निकाल्न आधा घण्टा लागेको थियो । शाहको हत्या पछि जाजरकोटमा सुरक्षा चुनौती थपिएको छ ।

२ किलो मीटरको दुरीमा शाहको हत्या भएको छ । तर प्रहरी भने आधा घण्टा पछि मात्र घटनास्थल पुगेको थियो । हत्यारा जंगलको बाटो लुकेर भाग्न सफल भएका छन् ।

हत्याराको खोजीमा चारैतिर सुरक्षाकर्मी प्रहरी परिचालन गरेको सहायक प्रमुख जिल्ला अधिकारी जनक राज शर्माले बताए ।

शाहको हत्यामा को को संग्लग्न थिए भन्ने खुल्न नसकेको सहायक प्रमुख जिल्ला अधिकारी शर्माले बताए । मृतक शाहको शव जिल्ला अस्पताल जाजरकोटमा राखिएको छ ।

शाहको हत्या योजनाबद्ध तवरले भएको राठौरले बताए । यस अघि नै शाहलाई अपरिचित ब्यक्तिबँट ज्यान लिने धम्की समेत आएको राठौरले बताए । शाहका आफन्त र शुभचिन्तक अस्पतालमा भरी भरीभराउ भएका छन् ।